Chauffeur femenino cu a mata dos hende cu auto ta keda encarcela te Juli ora cu lo trata e caso

*Fiscal a presenta mas acusacionnan contra C.F.D.

ORANJESTAD (AAN): Ayera merdia 2’or e dama C.F.D. a presenta den Corte pa e caso penal cu Ministerio Publico a cuminsa contra dje. Fiscal di Ministerio Publico ta acusa C.F.D. cu riba 4 Januari 2025 riba Smith Boulevard un tiki despues di Renaissance Hotel, a dal mata cu un Jeep dos persona y intento di mata otro dos persona, kendenan na e momento ey tabata cruzando caminda. C.F.D. tabata core cu un velocidad hopi halto y sigui core bay.

ACUSACIONNAN

Fiscal a presenta mas acusacionnan contra C.F.D. cu ta:

   - tabata core sin rijbewijs y sin keuringskaart;

   - no tabata core na man drechi di caminda;

   - tabata core mucho duro y no a controla su velocidad;

   - tabata core auto bou influencia di alcohol

E chauffeur femenino ta keda deteni

E caso tabata pro forma o sea cu Hues lo scucha peticion di abogado y Fiscal y tambe lo fiha fecha pa tratamento di e caso. Ta asina cu abogado a trece defensa pa suspende e detencion di C.F.D. y cu kier scucha dos testigo. Tambe e abogado a pidi pa laga un psicologo traha un raport di e situacion di C.F.D.

Fiscal a para riba cu C.F.D. mester keda encarcela, mirando e seriedad di e caso. El a mustra cu dos persona a wordo mata y e otro dos personanan a haci denuncia di intento di mata.

   Hues a rechaza peticion di abogado pa laga C.F.D. liber. Hues a bisa cu C.F.D. ta keda encarcela te dia 3 Juli 2026, dia cu lo trata e caso.

Hues a ordena tambe cu mester scucha dos testigo y cu psicologo lo traha un raport despues di a evalua C.F.D.