The content originally appeared on:
Diario
Situacion mundial y di Reino cada momento mas preocupante
*Prome cu segundo parti di 2024 prijs di petroleo lo impacta Aruba
*Sacrificio di Pueblo pa alcansa logro ta exigi nivel halto di politica
ORANJESTAD(AAN)—E situacion regional, mundial y den Reino cada rato ta mas preocupante.
Ayera na momento cu DIARIO tabata prepara pa bay imprenta, informenan alarmante tabata sigui drenta pa splica cu prijs dki petroleo mundial ayera tabata un careda pa alcansa 100 Dollar pa baril.
Prijsnan di e diferente companianan productor di petroleo ya tabata pasa 80 Dollar pero den cierto caso hasta 90 Dollar pa baril.
Esaki ta nifica, cu despues cu mundo a pensa cu e por drumi trankil sin miedo di e recesion cu un aumento enorme di prijs di petroleo por ocasiona, awe bista di mundo ta fiha riba prijs di petroleo cu na 2022 a entrega prueba kico e por haci cu situacion economico y social mundial.
Informantenan preocupa ta asisti DIARO den e situacion cu petroleo ta representa y cu sin duda prome cu e segundo parti di 2024 bati na porta, debi na e prijsnan actual lo afecta Aruba tambe.
Kico esaki lo nifica pa Aruba ta algo sumamente importante cu mundo politico mester duna atencion sigur despues di e sacrificio enorme cu Pueblo di Aruba a haci pa subi un caminda nobo di bienestar.
Autoridad di supervision financiero a papia un idioma sumamente cla con e Gobierno di Prome Ministro Evelyn Wever-Croes a logra cambia e rumbo desastroso di Aruba, cu mester haya continuacion.
Esaki ta encera cu tur partido politico awor mester duna atencion na e exigencia di democracia pa sostene e logro cu Gobierno Wever-Croes a alcansa cu su planificacion pero tambe basa riba e hecho cu Pueblo di Aruba a haci sacrificio enorme pa awe ta modelo di un planeta mundo carga cu problema y hasta un Reino cu politicamente ta sin rumbo.
Prijs di petroleo ta sigui subi hunto cu menaza mundial di guera y explosionnan economico, politico, social den reion di Aruba, cu no por wordo ignora.
Na e momentonan aki mundo politico di Aruba mester ocupa su mes cu e resultadonan cu e problemanan mundial y regional por tin pa Aruba, cu no merece cu politica barata ta reemplaza e nivel halto di politica cu a wordo hiba den cual Gobierno Wever-Croes a pidi Pueblo pa sostene su planificacion cu resultado cu awe Aruba a bira un pais, cu mundo ta aplaudi.
Na e momentonan aki, Aruba mester uni pa tur partido entrega na Aruba no loke nan kier alcansa pero e forma cu nan kier sigui carga e logro grandi di Pueblo di Aruba cu no por ignora e situacion mundial cu ta di preocupacion total y lo dal Aruba tambe na 2024 sigur pa loke ta trata prijs di petroleo.
