Cada aña menos baby ta nace na Aruba y por crea reto den futuro pa e mercado laboral

Edwin Jacobs di SVb

ORANJESTAD (AAN): Datanan cu DIARIO a ricibi for di señor Edwin Jacobs di SVb, ta indica cu e cantidad di baby cu ta nace anualmente, ta bahando fuertemente. Mas o menos 10 aña pasa, tawatin entre 1400 y 1500 baby cu ta nace pa aña. Actualmente, e cifra aki ta yegando na 800 pa aña. E cantidad aki, segun señor Jacobs, lo sigui baha.

   Tasa di fertilidad na Aruba ta entre esunnan mas abou na mundo. Esaki ta rond di 1.3 baby pa hende muhe den edad fertil. Pa un poblacion por reemplasa su mes, e  tasa mester ta 2.1 baby promedio.

   Segun señor Jacobs, e proceso actual ta un proceso ireversibel, dus no por draai e bek. Varios pais a purba stimula hende muhe haya mas yiu, sinembargo, esaki no ta dunando resultado. Un motibo di esaki ta, cu e generacion mundial nobo actual ta mira bida na un manera ful diferente cu e generacionnan prome.

   Señor Jacobs a remarca cu esaki ya ta pone Aruba caba den un situacion basta fastioso cu lo mester atende cu ne. Di un banda, menos yiu ta nifica cu na cierto momento lo tin menos trahado. Pa un economia cu ta sigui crece, den principio e cantidad di cupo di trabou ta aumenta.

   El a menciona cu na final di maart 2025, pa prome biaha a cera riba 50 mil relacion di trabou sigura na SVb. Esaki kiermeen cu tin mas di 50 mil cupo di trabou y na momento cu e cantidad di personanan local pa yena e cuponan aki tambe ta baha, lo tin un deficit riba mercado laboral pa yena cupo di trabou.

   Segun e, si na dado momento no yena e cuponan aki, e consecuencia lo ta cu empresanan lo no por funciona totalmente. Esaki na final di dia, lo causa tambe cu GDP lo baha. Of, el a enfatisa, lo mester importa mas trahado di exterior. Un otro posibilidad cu el a menciona ta automatisa of robotisa.

   Tambe, el a menciona cu por trece mas eficiencia den empresanan pa percura cu no tin cuponan mas y cu por draai cu menos trahado.

   Den tur caso, señor Jacobs a remarca cu e situacion ta trece un reto pa Aruba, un reto pa e mercado laboral den futuro si no atende cu ne. Y na momento cu e ta trece un reto economico, tur loke cu ta depende di economia pa funciona, lo bay ta bou presion, entre otro sector colectivo, cu ta depende riba loke sector priva ta produci.

   “Esaki ta un preocupacion y reto cu a lo largo lo forma un presion cu nos mester atende cu ne. Si aña pasa 800 baby a nace, pa ora nan crece y ta cla pa drenta mercado laboral aki 18 pa 20 aña, e cantidad lo ta 600. Plus lo tin mas o menos 1200 ciudadano cu ta bay cu pensioen, ya lo in un deficit di 600. Esakinan ta situacionnan cu mester cuminsa pensa y traha riba nan y no laga nada yega di sorpresa riba nos pa e ora busca solucion”, señor Edwin Jacobs a duna di conoce.