The content originally appeared on:
Diario
Potretnan ta papia pa nan mes:
ORANJESTAD (AAN) – Mare nos fotografonan semper por trece bunita potret cu relatonan constructivo, cu nos lectornan por goza di nan. Pero den nan trabao, hopi biaha no ta keda otro cu atende cu e otro banda di medaya, ora ta presenta situacionnan menos decoroso cu ta laga den nan mes y den comunidad un smaak marga, y hasta un tristeza di mira con vandalismo por converti algo cu merece respet, inspiracion, devocion, y paz mental, den un sentimento di repulsion.
Esaki ta e caso di locual nos colega mester a duna cobertura na locual vandalismo a haci na parti patras di e Sitio di Oracion di San Gregorio Hernandez, na Dakota. Un lugar cu poco dia atras a wordo drecha bunita, pa devotonan bay haci oracion y gradici algun fabor cu e Santo por a haci pa nan.
Danki Dios e parti paden di e Sitio ta cera y a scapa for di man di esnan cu a comete tal fechoria. Manera por mira riba potret un cantidad di sushi horible tin eytras, hende sin escrupulo a skirbi riba e container y riba un banda di muraya di e santuario.
Un panorama horible, cu sigur nos colega y comunidad a keda cu un sensacion espantoso ta un cacho morto, ya caba den estado di descomposicion, na +cadena y banchi bisti ainda, y sigur e holo no ta coi papia mes. Yen di articulo di cas nan a bin benta eynan, manera e tereno aki ta sirbi como dump.
E personanan cu ta ocupa cu e Sitio di Oracion a yama DIARIO pidi pa nos saca potret y skirbi kico a sosode eynan, e falta di respet y di berguenza pa haci algo asina cu propiedad aheno.
Ta di spera cu autoridad concerni tuma carta den e asunto aki y cu por tin un medida contra esnan responsable. Ohala algun habitante den e vecindario por a mira algo y señala ken por ta tras di e hecho mahos aki, cu sigur ningun ciudadano Arubiano of residente educa y decente por acepta!
