AZV poniendo mas atencion riba e dokternan di cas pa baha nan presion di trabao

Director di AZV Ir. Edwin Jacobs:

• Pa otro aña casi tur dokter di cas mester tin un POH 

ORANJESTAD (AAN)-- Director di AZV, Ir. Edwin Jacobs, den entrevista cu DIARIO, a declara cu aña pasa, e presion pa loke ta servicio di mas dokter di cas no tabata dje grandi ey. Na aña 2024 a traha ‘un processing paper” den cual AZV a mustra con nan ta desea di laga e cantidad di dokternan di cas aumenta.

   El a bisa cu hunto cu ImSan y Hospital a bin dos dokter di cas acerca bao  un dak, cu yama ‘Hoednan’ y tambe a habri, na 2024, dos nurse praktijk na Noord, hunto cu dokter Marquez y dokter Kelly.

“Intencion ta cu nos ta bay ta reduciendo e cantidad di dokternan di cas nan afdeling di pashentnan pa consultorio; tabata tin entre dos mil pa tres mil y nan a baha bay den direccion di dos mil cien y algo. Pues, nos ta riba e bon caminda pa cu esey. Nos a fortifica e dokternan di cas tambe cu POH di salud mental, y a capacita mas e POHnan cu tabata tin caba.

   Nos a cuminza tambe cu 15 POH nobo. Pa e otro aña dokternan di cas casi tur mester lo tin un POH pa baha e presion riba e servicio di dokter di cas”, Jacobs a splica. El a agrega cu aworaki., hunto cu esnan di hoed, tin 50 dokter di cas disponibel y esey ta nifica cu nos ta na un promedio di 2.000-2.200 asegurado pa dokternan di cas.

Jacobs a añadi cu e aña aki ta bay pusha pa habri un dokter di cas mas acerca. No un dokter di cas cu ta tuma un practica, un consultorio over, pero awo e ta cuminza full di nobo cu e dokternan di Noord.

“En principio, manera nos a palabra den e acuerdo di cuido di 2023, e cuido di dokter di cas tin cu haya hopi atencion, y por ripara tambe cu nos a inverti den modernizacion di contract di dokternan di cas, pa stimula nan productividad y nos ta mire den nan declaracionnan, cu nan ta mirando mas y mas hende. E tin su retonan ainda, mas tanto pa loke ta trata ora di comunica, di traha cita, y nos ta den combersacion cu Asociacion HAVA, con por sigui mehora esey tambe”, Ir. Edwin Jacobs a relata.