The content originally appeared on:
Diario
ORANJESTAD (AAN): Universidad di Aruba ta bay tin un anochi di informacion di e Master of Business Administration Program (MBA),
cual ta un programa di 2 aña, part-time, dedica na profesionalnan cu ta cla pa eleva nan carera, asina Dr. Rosabelle Illes a duna di conoce.
Esaki lo tuma luga awe diahuebs 4 di April y lo splica kico e programa aki ta encera, a bisa.
E programa aki ta encera cursonan manera innovation, entrepreneurship, strategic management, leadership, marketing y social media, entre otro.
Door di un colaboracion cu Universidad di Aruba tin cu University of South Carolina tin diferente profesional internacional cu ta bin bishita Aruba tur aña pa duna e cursonan aki y cu ta profesionalnan cu tin diferente publicacion academico, buki y a traha cu diferente compania grandi den exterior.
E studiantenan ta for di tanto sector publico como sector priva como tambe entrepreneurs. Ta trata di profesionalnan cu kier sigui nan carera profesional y bay den un siguiente stap. E programa aki ta ideal pa asina den dos aña haya un MBA, Illes a splica.
E cursonan ta wordo duna anochi, di 6:30 pm pa 9:30 pm. Tin algun sesion riba diasabra, pero mayoria di e cursonan ta den siman. Ta trata di dos curso cada bes pa 8 siman pa asina acomoda tur hende cu nan por sigui traha trankil, y tambe completa e programa, Rosabelle Illes a señala.
El a agrega cu na Aruba tin un demanda grandi pa MBA Programs y pesey nan ta pidi pa asisti na e anochi di informacion pa asina haya sa kico ta e rekisitonan. E MBA Program lo cuminsa den luna di September.
