The content originally appeared on:
Diario
Mientras cu diferente testigo ya a worde scucha durante simannan
ORANJESTAD (AAN): Awe Dialuna 13 Mei 2024, Hof di Corte Superior, ta cuminsa cu tratamento di e apelacion caso Avestruz, caminda 7 sospechoso a apela e sentencia di aña pasa. Ta asina cu durante dos siman caba, tabatin interogacionnan di testigonan a tuma lugar, preparando pa tratamento di e caso cu lo bay dura varios dia.
Scucha testigonan: Dialuna 13 Mei 2024, ta cuminsa cu scuchamento di e testigo señora Dammers den e apelacion di Harms. Pa 2’or di merdia lo scucha e testigo homber Barquez den e apelacion di Sevinger y Susebeek.
Diamars pa 9’or di mainta lo scucha Benny Sevinger como testigo den e caso di Harms. Pa 2’or di merdia lo scucha Fowler como testigo den e caso di Sevinger y Susebeek.
Cinco dia pa tratamento di apelacion: Ta asina cu Hof tin un schedule traha pa tratamento di e apelacionnan di: Carlo R. Mansur, Curt D. Harms, Edgar R. Werleman, Ninosca D. Nuñez, Maria L. Arends, Pieter Susebeek y Benny Sevinger.
E schedule ta cu lo cuminsa Diaranzon 15 Mei 2024, sigui Diahuebs 16 Mei 2024, Diabierna 17 Mei 2024, Dialuna 20 Mei 2024 y Diamars 21 Mei 2024.
Despues di e tratamento di e caso, e tres Huesnan cu ta forma Hof, lo bisa pa ki dia lo por spera sentencia.
