Arubus y Sindicato a bin hunto pa purba di yega na un aumento general di salario pa e trahadornan

​

Mediador Anselmo Pontilius:

Pa evita confrontacion entre e dos partidonan 

ORANJESTAD (AAN) Mediador di Gobierno Anselmo Pontilius, den entrevista cu DIARIO a referi na e situacion di e compania nacional di transporte, Arubus, y su consecuencia riba e salario di e trahadornan.

   Pontilius a splica cu wak bek, el a sinta aña pasa cu e partidonan na mesa y e ta un discusion basta largo, ya cu no tin contrato colectivo vigente pasobra nan a purba di varios forma, pa motibo cu a trata di cambia structura di salario, y a bin proposicion di tur dos banda: e compania y e sindicato, pero e partidonan no por a haya otro riba un structura nobo di salario. “Y banda di esey, logicamente e compania ta bisa cu e no tin e fondonan disponible pa cubri tur e gastonan aki”, Mediador Pontilius a señala.

“Aworaki tin un situacion cu e trahadornan ta reclama, manera tur trahado, cu durante e pandemia a laga nan entrega parti di nan salario, y consecuentemente, nan ta bisa cu aworaki ta nan turno pa haya por lo menos un adaptacion di salario”, Pontilius a agrega.

Mediador a indica cu el a yama e partidonan hunto aworaki, mirando cu e distancia entre nan ta grandi, pero e diferencianan tambe. “Y pa preveni pa haya bo den confrontacion entre e trahadornan y e compania, nos ta bay wak aworaki na mesa pa wak si tin algun proposicion, entre otro, por yega na un aumento general di salario, pa awo y otro aña, y posiblemente, un acuerdo pa termino mas largo”, Anselmo Pontilius a relata.

El a expresa cu e liña cora cu ta core ta cu tur trahado a entrega door di e pandemia, y e ta haya cu ta evidente cu e companianan (Post NV tambe) tin problemanan cu entrada vs salida, y e formula ta con ta bay coregi esaki.

“Manera ta conoci, un compania estatal manera Arubus, rond mundo transporte publico ta wordo subsidia y e pregunta na Arubus na e momento aki ta, kico ta e perspectiva pa e proximo cinco añanan, por ehemplo. Con bo ta mira mehoracion di bo entrada, si of no, versus e gastonan operacional cu bo tin”, Anselmo Pontilius a indica.

El a reitera cu gobiernonan ta subsidia compania di transporte publico rond mundo, pero e pregunta cu tin aworaki ta: “pero loke Arubus ta hayando subsidia como suma mensual/anual ta suficiente? Of nos tin cu adapta esaki”. Esaki ta parti di e puntonan cu tin aworaki riba mesa; si palabra kico ta adaptacion di salario cu ta un costo, unda eynan ta convence gobierno cu mester di un suma adicional si kier pa e compania draai keda operacional. Asina Anselmo Pontilius, Mediador, a señala.