Apesar cu e hobennan ta ricibi informacion tocante salud mental, no tin mehoracion

Rubiella Toppenberg, Trahado Preventivo di FADA:

• Ultimamente a constata hopi suicidio den hobennan 

ORANJESTAD (AAN) Den entrevista cu Matutino DIARIO, e Trahado Preventivo di Fundacion Anti Droga Aruba (FADA), Rubiella Troppenberg, a duna di conoce cu e ta sigur cu durante e comienzo di aña, nan a ricibi hopi peticion, pa temanan riba loke ta salud mental.

  “Pa loke ta salud mental ta manera cu e no ta mehora. Mi no ta wak un mehoracion pasobra bo ta mira cu e problema ta keda presenta. Anto na momento cu e problemanan ta keda presenta, mi ta kere cu ta momento cu nos mester bay sinta hunto den ekipo, fundacionnan, partnernan cu ta traha riba salud mental, pa wak kico ta e problema cu esaki no ta mehorando”, Rubiella a señala.

   El a menciona cu FADA ta duna informacion na scolnan y nan ta gradici scolnan cu nan ta pidi constantemente pa e muchanan. Pues, e muchanan ta wordo informa, pero na momento cu nan ta duna informacion, mester tin e “back up” pasobra na momento cu e hoben mester ayudo, e mester sa tambe unda e mester bay y ora e bay, mester ricibi ayudo. 

   “Na momento cu hende ta bati na bo porta, pa ricibi ayuda y bo ta warda un par di luna, bo ta perde e persona aki. Nos mes ta wak cuanto caso tin, ultimamente, di suicidio por ehemplo di hendenan hoben y edadnan tiki tiki ta baha mas. Bo ta wak cu uso di droga ta subi. Pakico? Pasobra na momento cu no tin ayudo, tin di nan ta bay busca otro enfoke”, Rubiella Toppenberg a indica.

El a agrega cu ta momento pa tur instancia concerni sinta hunto pa wak na unda e problema ta, pasobra nan ta ricibiendo informacion, pero ora nan ta busca ayudo, eynan e situacion ta tranca.

“Anto eynan ta na unda nos tin cu bay wak con nos por soluciona esaki”, Rubiella a reitera.