Ademas di material nobo Cuerpo di Bombero tambe lo haya entrenamento y opleidingnan bek

Despues di hopi aña tranca:

ORANJESTAD (AAN) – Siguiendo cu e conferencia di prensa di gobierno, dialuna, Minister di Husticia y Asunto Social, señor Rocco Tjon, a duna di conoce tambe, cu no solamente a adkiri material nobo pa Cuerpo di Bombero di Aruba, pero tambe tin palabracionnan haci cu e companianan Mericano pa loke ta trata e trainingnan pa e personal di Brandweer, pa asina nan por haya e informacion y training necesario tambe.

E dignatario a agrega cu el a compronde for di Sindicato y Management Team, cu e ultimo trainingnan ta data di 2007. Kiermen, pa hopi aña no tabata tin e trainingnan adecua, y e minister ta hopi contento cu e input aki ta wordo duna tambe, di e forma aki na Brandweer.

Banda di esaki, pa hopi aña tabata tin opleidingnan pega pa e personal di Brandweer. E opleiding pa Manschap B a cuminza y otro luna e opleiding pa Bevelvoerders tambe lo cuminza despues di hopi aña cu nan tabata tranca, Minister di Husticia a bisa.

“Obviamente esaki ta importante pa e bon funcionamento di e departamento, pero tambe pa e ‘carrier line’ di e personal mes. Resumiendo, mester bisa cu bao di Gabinete Wever-Croes 1 y aworaki, a continua cu esaki. E Post di Brandweer, pa loke ta San Nicolas Sierra ta bao pleno renovacion, y manera ta conoci, pa fin di aña esaki mester ta completamente cla”, Minister Tjon a relata.

E mandatario a reitera cu tur e promocionnan ta na Gobernador pa wordo firma y e ta calcula entre e fin di e luna aki pa otro luna e personal lo haya nan Landsbesluit. E mandatario a indica cu e 7.5 miyon florin adicional riba presupuesto di Brandweer a wordo aloca pa por adkiri e dos tankwagen truck di tres mil galon, y tambe e dos trucknan autospuid di mil galon y obviamente e trashtruck nobo cu ta yega e aña aki. Un bez mas e dignatario a bisa cu a logra esaki hunto cu Management Team, pero tambe e manera constructivo con e Sindicato di Bombero semper a atende cu tur e aspectonan aki, a haci cu awe por bin cu e anuncio aki, y por bisa cu den un aña a duna atencion na e aspectonan infrastructural, e parti di materialnan cu ta necesario pa e seguridad di e bomberonan, e trucknan, e promocionnan y e opleidingnan. “Y si nos pone esaki den perspectiva, e presupuesto di Dienst-brandweer Aruba, pa aña ta consisti di 2 miyon florin pa e post bao di cual tur e puntonan cu a wordo menciona mester a wordo adkiri, a percura pa e aña aki aloca adicionalmente alrededor di 7.5 miyon florin, pa nos  por a tene cuenta cu tur e aspectonan aki, pa  alivia e situacion di Brandweer, cu despues di hopi aña, bao Gabinete Wever-Croes 1 y 2 por a atende cu tur e puntonan aki”, Tjon a bisa. Pa conclui el a gradici e Management Team y Sindicato di Bombero, Departamentonan Huridico y di Finanzas di Ministerio di Husticia, cu conhuntamente a percura pa esaki den un aña.