The content originally appeared on:
Diario
Dalmento di Diasabra atardi
*Victima Marco Marceliano Tromp ta biba na Palm Beach
ORANJESTAD (AAN): Tabata Diasabra atardi banda di 4:00 pm, cu chauffeur di un auto sedan Nissan Almera color shinishi cu number A-24490 staciona pariba di caminda di Noord pa Westpunt, na altura di Yen-Yen Bar & Restaurant na Kamay.
E Nissan Almera ta para banda di caminda cara panort. A resulta cu e chauffeur kier a sali di eynan, pero haciendo un U-turn, esta un birada di 180º pa asina bay bek zuid. No ta conoci si acaso el a check su spiel bon, pero diripiente a primi trot, subi caminda ta lora pa asina bay bek zuid.
El a haci esey net ora cu un vehiculo Compact SUV cu ta un Honda CR-V color cora kima cu number A-52927 ta bin di zuid y bayendo nort.
E chauffeur di e Honda CR-V casi no por a reacciona mes, como cu inespera e Nissan Almera a subi caminda. Resultado di esey ta cu e Honda a bay dal casi sin brake cu tur su forza riba e porta di chauffeur di e Nissan. E impacto aki tabata fuerte cu lo a causa whiplash, y multiple trauma na cabez di e chauffeur.
E vehiculo y e auto a finalisa como 4 meter mas leu, mey-mey di caminda net dilanti entrada di NG’s Supermarket cu ta situa banda pabao di e caminda.
E prome hendenan cu a yega eynan, a bin nota cu e chauffeur den e Almera tin hemoragia, y tin sanger saliendo di boca y for di su cabez. Un hobencito cune den e auto tambe tabata levemente herida, pero basta spanta. Mesora yamadanan a cuminsa drenta na Central di Polis. A dirigi mesora Polisnan di Noord, y a pone Centro di Alarma na altura, cu a dirigi 2 unidad di Ambulans. Otro unidadnan di Polis, incluyendo Polis motoriza a yuda pa asina cera trafico.
Ora cu Ambulans a yega, nan a bay check e situacion di e chauffeur masculino den e Nissan Almera, pero a bin mira cu e no tin señal vital mas. A informa Polis di esey, y a pidi Centro di Alarma pa manda busca un Docter.
Mientras tanto Polis a pidi presencia di Specialista di Trafico, ekipo forensico di BFTO, personal di Bureau Slachtofferhulp, y demas instancia halto yega eynan. Personal di Ambulans a trata esnan di Honda CR-V tambe, pero nan ta levemente herida.
Banda di 5:00 pm, Dr. Texier a presenta y a constata morto di e chauffeur Marco Marceliano Tromp, naci na Aruba dia 17 Juni 1943. E ciudadano aki di 80 aña di edad ta biba como 875 meter mas pabao na Palm Beach.
Esaki a bira e di tres morto den trafico pa aña 2024. Cuerpo Policial a manda un mensahe pa tur automobilista pa maneha trankil, comporta y sigui reglanan di trafico.
DIARIO como tambe Cuerpo Policial ta manda palabranan di profundo condolencia na famia di e fayecido.
