AC Hotels by Marriott a habri un hotel na Punta Cana

SANTO DOMINGO: E cadena hotelero AC Hotels by Marriott a anuncia Diadomingo e apertura di hotel AC Hotel Punta Cana by Marriott,

cu a bira nan prome na Republica Dominicana.  Net awor cu e pais ta den pleno recuperacion di turismo, despues cu aña pasa tur cos a cay den otro debi na pandemia.

   E hotel aki ta uno cu inspiracion contemporaneo, y ta den e centro di e zona turistico mas importante di e pais, y un di e destinacionnan mas bishita eynan den Caribe.  E Hotel ta conta cu 129 camber, incluyendo 2 Suites.

   E lugar aki ta apenas 15 minuut di e Aeropuerto Internacional di Punta Cana, y ta pone hunto e idea di e marca AC Hotels di combina negoshi y diverticion den un solo viahe, loke ta conoci den mercado como ‘viahero Bleisure”, segun Yamil Montes de Oca, kende ta general manager di e hotel.

   Turismo ta e principal fuente di divisas na Republica Dominicana, cu den e prome ocho lunanan di e aña aki a ricibi 2.9 miyon bishitante, cu ta casi double di e cantidad di mesun periodo di 2020, pero e ta djis 37% di e cantidad di 2019.