Diferente hende local a bira victima di hacking di credit card

The content originally appeared on: Diario

ORANJESTAD (AAN): Siman pasa caba por a nota cu ta hopi hende local a cuminza ripara, cu cierto “mercancia” y otro “cobranza” grandi a aparece riba nan credit card. 

Compra di mercancia, y producto na paisnan leu, manera Singapore, Japon, Australia, y Thailandia.

   Esey a socede, siendo cu nunca nan a manda cumpra esaki, y ademas no a ni bandona Aruba e aña aki ainda pa haci un viahe.

   Loke a pasa aki ta ‘Credit Card fraud’, y hopi hende no sa kico pa haci ora esaki socede cu nan.  Aki claramente ta notable cu bo informacion di account a wordo exponi na ladronnan, y bo tin di core tuma accion pa sigura cu nada mas serio socede.

   E prome ta pa contact e Banco cu a emiti e credit card aki, y blokea e carchi mesora.  Varios banco tin number di contacto pa caso di emergencia, y algun awor ta dunabo e chens di haci e blokeo aki hasta riba bo App, of via nan website pa haci esey mas facil online.

   Esaki nifica cu e banco ta bay blokea bo carchi, y pa proximo simannan lo bo no por use mas, pasobra nan ta bay saca uno completamente nobo pa bo.

   Fuera di esey, trata di vigila e transaccionnan di bo carchi cuidadosamente pa mira si acaso tin mas caso unda ta cobra producto fraudulente riba bo carchi.  Tur esaki bo tin di bay disputa cu bo Banco, pa asina nan start un investigacion.  Si acaso nan descubri cu enberdad fraude a wordo cometi cu bo placa, lo bay dura un poco, pero e placa lo wordo debolbi na bo.

   Con cos aki por socede: Esey ta pregunta di hopi hende, y algun di nan a haya sa caba.  Na luna di April, a bira conoci cu un compania multinacional cu ta ofrece un adres na Merca pa asina por ship productonan pa bo na Aruba y otro paisnan, a bira victima di ‘security breach’.  Hackernan a logra drenta den nan computer servers, y a horta cantidad di informacion.

   Aunke e CEO di e compania a manda un email pa tur hende pa bisa cu tur cliente ta safe, y nada lo no pasa… ta parce cu awor ta saliendo na cla cu e numbernan di Credit-Card di hopi hende a leak toch, y ta wordo bendi riba ‘black market’, y hendenan ta haya e numbernan aki, traha carchi falso, y ta subi caya na paisnan hopi leu pa bay haci compras cu bo credit card number.

   Por lo tanto, e siman aki DIARIO ta recomenda tur hende pa subi online y check bo credit card statements pa mira si diripiente bo ta nota un compra of cobranza cu bo no ta reconoce, y corda nota mesora ta ki paso bo tin di haci pa bay salbaguardia bo account.