The content originally appeared on:
Diario
Tyson Lopez, director di FPNA:
ORANJESTAD (AAN) Tyson Lopez, Director di Fundacion Parke Nacional Aruba (FPNA), den entrevista cu DIARIO a duna di conoce cu Mangel Halto haya un cara nobo, aunke ainda falta mas cos pa drecha.
Lopez a splica cu FPNA a termina e proyecto cu nan a palabra cu Oficina di Turismo di Aruba (ATA) cu a haci un peticion pa embeyece e area aki, drecha e palapa, y restaura e brugnan.
“Di nos banda, nos a haci e parti di naturaleza, di crea e canal bek, di cual nos a experiencia cierto dificultad cu ne, pasobra un bez cu nos habri’e den dos pa tres dia e santo cu tin eynan ta yena bek y nos tin cu continua cu e parti ey pa wak con nos ta sigui dilanti cu e canal pa e mangrove, pero locual ta embeyecimento cu e palapa el a termina” Tyson Lopez a splica.
El a agrega cu aworaki nan tin otro peticion, tambe for di ATA, pa drecha e resto di palapanan riba e costa. “Nos ta papiando for di Mangel Halto te cu Marina Pirata cu tin cierto palapa cu mester mantencion, y nos tin peticion pa colabora cu ATA riba esey, un biaha mas”, Lopez a señala.
Locual ta FPNA bay haci pa e comunidad ta pone su mesun borchinan di regla riba e zona, pero tambe ta bay tin borchinan di informacion tocante e balor di naturaleza, por ehemplo e crap cu ta cana eybanda kico ta nan funcion, tin e yerbanan di lama, tambe e coralnan, pasobra tin un caminda unda hopi hende ta haci show “after diving” eynan, pa nan sa cu nan ta bayendo un area cu ta proteha pasobra ta e parti marino y tambe kico ta e balor di loke FPNA ta haci eynan.
Actualmente, nan ta buscando mas personal pa nan por eherce nan trabao manera cu mester ta. “Si tur hende por corda, durante Covid-19 nos a sufri un impacto di nos entrada y awo y gradualmente, nos ta buscando hende bek pa asina nos por haci nos tarea manera mester ta, entre otro monitor Mangel Halto y otro areanan cu nos tin den nos maneho”, Tyson Lopez a indica.
