The content originally appeared on:
Diario
Lo warda riba sentencia di Corte Superior
ORANJESTAD (AAN): Dialuna mainta Ministerio Publico a cuminsa cu e caso pa kita propiedadnan di Benny Sevinger. Esaki relaciona cu caso Avestruz, caminda Fiscal ta haya cu Benny Sevinger a haci labamento di placa.
For di comienso di tratamento di caso Avestruz, Fiscal di Ministerio Publico a anuncia den Corte cu lo bay cuminsa un investigacion financiero pa cuminsa un caso di kita propiedadnan di Benny Sevinger.
Benny Sevinger no a presenta: Dialuna mainta, solamente abogado mr. Kock, mr. Illes a presenta den Corte pa e caso cu tabata un “regie zitting” o sea cu e no ta worde trata. E abogado ta haya cu Benny Sevinger no mester ta presente pasobra ainda no ta bay trata e caso. Ademas tin e caso di Avestruz andando.
Hues di exterior pa trata caso: Por a constata cu ta un Hues, cu no ta di Aruba, sea di Curacao of di Hulanda, a bin Aruba pa trata e caso aki. Esaki ta pa mustra imparcialidad den tratamento di un caso caminda un Parlamentario ta e sospechoso.
Demanda di 940 mil Florin: Fiscal a bisa Hues, cu a haci un investigacion financiero caminda ta demanda 940 mil Florin, cu Sevinger mester paga back. Fiscal a bisa cu lo por cuminsa e caso pa evita cu e caso ta bira mucho bieu.
Abogado mr. Kock a bisa Hues cu e ta prefera pa warda te ora tin sentencia di Hof di Corte Superior riba e apelacion caso Avestruz. E abogado a bisa cu na Juli 2024 lo tin sentencia den caso apelacion Avestruz. El a bisa cu e no a haya chens di studia e rapportnan cu Ministerio Publico a manda, door cu e ta defende Sevinger den e apelacion Avestruz.
Segun mr. Kock, den e promer sentencia, Sevinger a worde declara liber di varios acusacionnan y e ta haya cu e suma menciona lo ta hopi leu di e realidad. El a pidi Hues pa mihor warda riba sentencia di Hof.
Fiscal a bisa Hues cu e no tin nada contra pa warda na Juli 2024 cu lo tin sentencia. El a bisa Hues cu for di April 2022, a presenta e demanda pa Sevinger paga back y mr. Kock ta na altura. Na opinion di Fiscal, e caso no tin nada di haci cu Sevinger a worde declara liber di malversacion. El a bisa cu tin investigacion cu ta mustra placanan cu Sevinger a haya.
Pospone caso pa October 2024: Hues a bisa cu mirando cu Fiscal no tin nada contra pa warda, e ta haya cu mihor warda e sentencia na Juli 2024. Hues a fiha 21 October 2024 pa 8.30 di mainta lo bolbe tene un “regie zitting” pa mira con leu lo ta.
Hues a bisa Fiscal cu un luna promer cu tratamento di e caso, e mester laga sa si ta bin cambio den e acusacion. Fiscal a bisa mr. Kock cu 2 siman promer cu tratamento di e caso, e mester laga sa si e ta desea di haci investigacionnan. Esey ta pa Hues ya ta prepara pa 21 October 2024 cuminsa cu e preparacion pa stipula un fecha caminda lo bay trata e caso.
