A firma un acuerdo cu APA pa renova edificio di Polis Maritimo

Minister Rocco Tjon hopi satisfecho:

ORANJESTAD (AAN) – Diaranzon mainta a tuma lugar un conferencia di prensa di Gobierno, den e edificio nobo Marpol, unda a yega na un acuerdo (Huurovereenkomst)  cu Aruba Ports Authority, pa renova e edificio aki, sede di Polis Maritimo. E acuerdo aki a keda formaliza y firma diaranzon mainta.

Minister di Husticia, señor Rocco Tjon, a menciona cu esaki ta hopi importante pa gobierno, y nan ta hopi contento cu e logro aki. “E ta hopi importante, vooral pa mi coleganan cu pa hopi tempo caba ta percura pa eleva seguridad na Pais Aruba, y muy en particular ora ta toca e seguridad den nos frontera, y cu apesar cu nan no tabata tin e miho condicionnan pa loke ta nan edificio, semper nan a keda duna e miho di nan banda y pesey mi ta kere ta asina importante cu e inversion aki, a tuma lugar”, e mandatario a expresa.

Minister di Husticia a gradici su coleganan minister y a bisa cu sin nan cooperacion esaki lo no tabata posible. Pero hopi importante ta un partner strategico pa por a logra esaki, cual ta Aruba Hospitality Security Foundation. “Nos ta hopi gradici na boso sosten pa cu esaki, no solamente den e proyecto aki, pero tambe pa forma parti di e vision y e plan  di maneho cu tin, pa loke ta eleva e seguridad y muy particularmente, den e area turistico. Un gradicimento hopi grandi tambe di nos banda, pa cu esaki”, e dignatario a remarca.

Minister Tjon a menciona cu e inversion aki, obviamente, ta uno grandi, pero hopi mas inversion lo tuma lugar, y e kier pa su coleganan, specialmente di Cuerpo Policial y Polis Maritimo, compronde cu e balor cu nan tin pa percura pa eleva e seguridad na Aruba, ta mucho mas grandi cu e miyones cu gobierno ta inverti den infrastructura y den material.

“Pasobra na final di dia, bo por tin tur e material necesario pa eherce bo trabao, pero si no tin e dedicacion cu boso a sa di mustra tur e tempo aki, nos no lo a logra e metanan tampoco. Di e banda aki, boso por ta sigur cu lo sigui conta cu e sosten di Ministerio di Husticia y Asuntonan Social, pa sigui logra e otro metanan cu boso tambe tin, boso dilanti”, Minister Rocco Tjon a subraya.