The content originally appeared on:
Diario
ORANJESTAD (AAN): Diahuebs 15 di februari 2024 di sport vereniging Racing Club Aruba, RCA.
Tabata na 1934 cu a funda e club y por bisa cu RCA ta e club mas bieu y grandi na Aruba den ramo di e deporte rey, futbol. Pa cuminsa cu e celebracionnan oficial a organisa un santo sacrificio di misa, gradiciendo Dios Tata Todopoderoso pa tur locual E a brinda e club di RCA den su trayectoria impresionante y historico. Despues di e santo sacrificio a bay na Club di RCA na Solito pa un brindis. Aki tabata tin diferente invitado presente manera minister di Deporte sr. Endy Croes, president actual y diferente ex-president y miembro nan di directiva di RCA banda di hopi miembronan, voluntarionan, mayornan y patrocinadornan.
Durante e brindis, sra Erin Croes a guia e programa oficial como maestro di ceremonia caminda tabata tin varios orador cu a hiba palabra y e anochi a culmina den bautismo di uniform di tur e divisionnan di nos prestigioso club.
Den e diferente discursonan cu a ser hiba, tur orador a sa di trece puntonan importante dilanti pa cu deporte engeneral pero tambe puntonan remarkable pa cu RCA. Minister di deporte sr. Endy Croes a enfatisa e importancia di locual ta trata e relacion entre deseo-disciplina-dedicacion y determinacion pa cu deporte y den RCA e punto nan aki ta presenta y ta hasi cu awe RCA ta e club cu tin un historia impresionante den deporte na Aruba y Caribe Hulandes.
Tambe e a remarca cu RCA tin mas titulo na Aruba como campeon di futbol (34) pero tambe tin mas di 20 titulo como sub-campeon. Esaki ta ilustra cu RCA a hunga mas cu 50 vez un wega final den su 90 aña di su existencia.
E president actual, sr. Jeff Lopez a enfatisa ariba kico e ta pa sirbi un club di taya manera RCA den forma voluntario, cu amor, dedicacion y perseverancia. Como presidente e y su comision ehecutivo ta sirbi e club incansablemente enfrentando diferente reto pero tambe momento nan di gran placer cu diferente logronan importante pa cu existencia di RCA y cu su gran deseo ta pa mira turf riba e veld.
Señor Randolf Lacle como presidente di AVB a subraya tres punto den su discurso. E promer punto tabata e historia impresionante di RCA cu diferente logro remarcabel den futbol di Aruba y Antiyas Hulandes.
Djey señor Lacle a subraya e importancia y realce di trabounan boluntario, den union manera un famia, di generacion pa generacion, y semper cla pa yuda otro clubnan, ta locual cu a hasi posibel pa RCA ta e club mas bieu y mas grandi den deporte aki na Aruba a menciona tambe cu RCA ta e unico club na Aruba cu den su trayectoria di 90 aña nunca a degrada pa division uno.
Como ultimo orador Mandy Leijenaar, a splica cu un patrocinador no ta solamente sostene un club financieramente pero e ta e compromiso y e confiansa cu bo ta para y confia den e vision y mision di e club.
Den nomber di directiva di RCA, kier a hasi uso di e oportunidad aki pa extende un palabra di gratitud na e comision organisatorio y sin laga afo Elite pa un tremendo evento pa cu inicio di e celebracionnan di e 90 aña nan di RCA.
Pa por celebra e milestone aki e ta refleha ariba hopi dedicacion, respet, amor y disciplina. Pesey un bes mas un palabra di gratitud ta bai tambe na nos miembronan, coachnan, leidsternan, hungadornan, patrocinadornan y demas boluntarionan y sin laga afor e fiel fanaticada Tricolor. Sin boso e 90 añanan aki lo no tabata posibel.
Y keda pendiente pa tur locual ta bira e gran aña di celebracion.
