A duna 30 luna di prison pa trio cu a importa 5 kilo di cocaina

ORANJESTAD (AAN): Diabierna mainta via video conference Hues a dicta sentencia den e caso penal cu Ministerio Publico a cuminsa contra e hombernan A.C.R., G.V.D.S., V.V.L. y W.Q.A.

   Tur ta worde acusa di importacion di cocaina ariba e anochi di 22 pa 23 November 2020. E cargamento di cocaina lo mester a yega cu boto na Arashi y despues hiba na e cas di cunucu na Kurimiauw (distrito di Noord).

   Hues ta haya A.C.R., V.V.L. y W.Q.A. culpable di a importa 5 kilo di cocaina. E magistrado a declara G.V.D.S. liber di e acusacion di a importa cocaina pero a haya G.V.D.S. culpable di tabatin 400 gram di marihuana den su cas di cunucu na Curimiauw. Ta na e cas aki tambe Polis a haya e 5 kilo di coaina scondi y a detene e otronan A.C.R., V.V.L. y W.Q.A.

   EXIGENCIA FISCAL:  Tres siman pasa tratamento di e caso a tuma lugar caminda Fiscal a bisa Hues cu e sospechosonan kier laga pasa cu nan no sa nada di droga y cu pa casualidad nan tabata eynan. A.C.R. ta responsabel pa e cantidad di marihuana cu a hay’e cun’e y G.D.S tambe. A haya mas cu 5 kilo di cocaina na e cas.

   Ta hopi straño cu ningun hende sa di e droga aki. Polis a scucha combersacionnan cu a mustra cu droga yega na beach. A mira auto di A.C.R. na e beach y despues a bay na e cas di cunucu na Curimiauw. Haya cu loke e grupo ta declara no ta cuadra nada cu loke Polis a observa.  No a kere loke A.C.R. awor ta bin declara den Corte.

   Su siguiente dia ora Polis a bay investiga na e cas, a haya e droga. Haya cu e grupo tabata sa di e droga. V.V.L. hasta a core bay cu e tas cu droga. A haya 3 kilo den e tas. Ta mucho casualidad cu esnan cu a scucha den e tap tabata na e cas. Haya nan culpable di importacion di 5 kilo di cocaina. Haya cu ta henter un organizacion a tuma lugar. Exigi 36 mnd. A.C.R., V.V.L. y W.Q.A. y 42 mnd G.D.S. kende anterior condena pa droga.

   SENTENCIA:  Hues a bisa cu e acusacion contra A.C.R., V.V.L., W.Q.A. y G.D.S. ta cu nan a importa cocaina riba e anochi di 22 pa 23 di November 2020. Tambe ta acusa G.D.S. di posecion di 400 gram di marihuana.

   POLIS TABATA VIGILA:  Hues a bisa cu a base di scucha yamadanan di cellular, Polis tabata vigila e movecion di e grupo aki. A persigui un auto, maneha pa A.C.R. cu un aparato special. Asina a haya sa cu e droga a yega na Arashi y despues bay na e cas di cunucu di G.D.S. Su siguiente dia a haci un investigacion na e cas caminda a haya cocaina y a haya A.C.R., V.V.L. y W.Q.A. Ta asina cu A.C.R. a core bay y a tira un tas den un vijver. Den e tas a haya cocaina. A.C.R.

    CULPABEL DI IMPORTA COCAINA:  Hues a bisa cu A.C.R., W.Q.A. y V.V.J. a importa cocaina e anochi ey. Pa cu e castigo, Hues a mustra cu droga ta peligroso pa salud di hende. E cantidad di 5 kilo ta destina pa destribui. Esey ta fomenta criminalidad.

   E importacion ta duna Aruba un mal nomber. Hues a tuma nan na malo pa esaki. El a condena e trio aki esta A.C.R., W.Q.A. y V.V.J. na 30 luna di prison.

    UN SOSPECHOSO DECLARA LIBER:  Pa loke ta G.D.S., Hues a bisa cu G.D.S. a desmenti di tabata envolvi cu cocaina. El a admiti di tabatin e 400 gram di marihuana. Na opinion di Hues, investigacion a mustra cu e droga a worde hiba na e cas di cunucu di G.D.S. y a haya e droga eynan. A detene G..D.S. y su amiga cu tabata keda na e cas. Hues a bisa cu for di yamadanan por conclui cu ningun momento a menciona G.D.S. y tampoco e tabata papia. Loke si ta constata cu ora A.C.R. a yega na e cas y despues a bay, un muher a bisa cu Budha ta na caminda. Despues A.C.R. a bay cas di W.Q.A.

   Na opinion di Hues, e solo hecho cu a haya droga den G.D.S. su cas, no ta suficiente pa bisa cu G.D.S. sa di e lote di cocaina. Ta un muher tabata sa di e droga aki y a papia cu A.C.R.

   Hues a declara G.D.S. liber di a importa cocaina. Hues ta haya G.D.S. culpable di e 400 gram di marihuana y a conden’e na 12 luna di prison.