Ministro Wever a atende e Foro di Pago Nacional encuanto con A.I. ta transformando experiencianan digital di pago
Organiza pa Banco Central
ORANJSTAD (AAN): Digitalisacion y innovacion tecnologico ta cambia e manera cu comunidad awendia ta haci pago, maneha finansa y haci negoshi. Pa Aruba, esaki ta representa oportunidadnan importante pa modernisa e sector financiero y fortalece economia.
Diahuebs Ministro Geoffrey Wever a participa na e di cuatro edicion di Foro di Pago Nacional (FPN), organisa pa Banco Central di Aruba (CBA), cu como tema central "How AI is Transforming Digital Payment Experiences".
Un di e momentonan mas interesante tabata e panel di representantenan di e cuatro banconan comercial di Aruba, cu a comparti nan vision tocante e influencia di inteligencia artificial (AI) riba experiencia bancario y con nan organisacionnan ta prepara pa incorpora e tecnologia aki den nan servicio. Tabata un berdadero placer pa mira nos profesionalnan y bankeronan local destaca riba escenario, abordando un tema asina innovativo y compleho cu tanto profesionalismo, profundidad y conocemento. E calidad di e dialogo ta mustra e nivel halto di talento y capacidad cu tin aki mes na Aruba den e sector financiero.
Un otro momento destacabel tabata e excelente presentacion di Dr. Kristel de Nobrega, un experto Arubiano riba tereno di cybersecurity y tecnologia, cu a aborda e tema "Understanding AI Risks & Opportunities in a Changing Digital World". Un presentacion di gran nivel, cu a profundisa den e oportunidadnan cu inteligencia artificial ta ofrece, pero tambe e riesgonan cu mester wordo identifica y maneha cu responsabilidad.
Tabata un mainta yen di inspiracion, intercambio di conocemento y profundidad riba un tema cu lo tin un impacto cada bes mas grandi riba nos economia y sistema financiero.
Como Minister di Finansa y Asunto Economico, e ta considera innovacion digital un elemento esencial pa desaroyo economico di Aruba. Un sistema di pago moderno, eficiente, accesibel y sigur ta facilita actividad economico, fortalece competitividad di nos empresarionan y ta beneficia consumidor.
Pero innovacion mester bay man den man cu seguridad digital, proteccion di dato y confiansa. Nos mester aprovecha e oportunidadnan cu tecnologia ta ofrece, mientras nos ta sigui proteha stabilidad y integridad di nos sistema financiero.
“Mi kier expresa mi aprecio y gradicimento na Banco Central di Aruba pa organisacion di e foro importante aki, cu ta reuni expertonan local y internacional y ta stimula un dialogo di alto nivel tocante futuro di nos sector financiero.”
“E futuro digital no ta algo cu nos mester solamente warda. Ta algo cu nos mester prepara, forma y desaroya hunto,” Ministro Wever a termina bisando.
Related News
Gobierno ta fortalece cooperacion nacional pa proteha integridad di sistema financiero y e...
Otro paso concreto pa realisa conexion di ferry entre Aruba y Curaçao
Diahuebs atardi storing a pone 2 transformer conecta cu planta di RECIP IV cay afo
