E luna aki investigacion na HOH ta termina y Gobierno mester actua di biaha
Parlamentario Shailiny Tromp-Lee:
ORANJESTAD (AAN): E situacion entre HOH, Gobierno y AZV na mi opinion, pueblo a warda basta caba. Segun HOH, desde februari 2026 nan a alerta riba nan situacion financiero delicado, y na maart nan a inicia combersacionnan cu directiva di UOAZV y e Minister. Dia 9 di juni nan a bolbe bati alarma y a haci un presentacion na Ministerraad tocante nan situacion financiero y e consecuencianan cu esaki ta trece cu ne.
Sinembargo, Minister Wyatt-Ras ta indica cu ta te na mei el a haya informacion di e situacion via AZV. Ken tin rason of ken ta papia berdad nos no sa, pero e crisis na HOH si ta real y su impacto ta wordo sinti diariamente den nos comunidad.
Despues di e presentacion di dia 9 di juni a bin e proceso pa inicia y ehecuta un investigacion: di juli te fin di augustus a traha riba e onderzoeksopdracht, y fin di augustus a firma e acuerdo di trabou. Pa fin di september e investigacion a start, cual lo tin un duracion di 7 siman, y esaki ta termina e luna aki, november 2026.
Consecuencia di tardansa
Nos mester a acepta e proceso ey, pasobra Gobierno a bisa cu mester tin informacion obhetivo y verificabel prome cu e por tuma decision. Pero e realidad ta cu mientras nos ta warda, cuido ta sufri: pa dia un OK ta cera. Endoscopie no ta traha riba diasabra. Tin remedi y material cu no por keda cumpra. Lista di espera pa operacion ta sigui crece. Cu otro palabra, e situacion aki a crea limitacionnan den cuido y a afecta e calidad, cu yen di posibel consecuencia negativo.
Ainda no tin solucion duradero y sostenibel
Hopi hende ta bisa cu den prensa ta keda indica cu HOH a haya placa y toch e situacion no ta mehora. Y e informacion contradictorio den prensa sigur no ta yuda. Segun AZV, HOH a ricibi un total di 31 miyon na adelanto den 2026, y cu e ultimo 15 miyon nan a ricibi dia 3 di november ultimo. AZV ta informa cu nan a cuminsa duna e adelantonan aki desde februari pa HOH por sigui opera.
Di otro banda, HOH ta bisa cu e ultimo 15 miyon ey NO ta un adelanto, sino un pago parcial pa cuido cu HOH a brinda caba na 2025. Ta trata di placa cu nan mester a haya caba pa trabou haci aña pasa, y ainda no tin un acuerdo definitivo pa 2025. Ademas, HOH ta aclaria cu e adelantonan no ta placa adicional, sino cu nan ta forma parti di e presupuesto actual.
Sea cual sea e definicion, e punto ta mesun cos: HOH no a haya placa extra. Nan a haya parti di nan propio placa mas trempan, y parti di loke nan mester haya pa trabou haci caba. Mientrastanto, e problema di fondo, esta cu e presupuesto no ta cubri e costo real di cuido teniendo cuenta cu inflacion, subida di prijs y aumento di volumen, ainda no a wordo soluciona.
Pa colmo, segun HOH, AZV tin intencion di cuminsa desconta e adelantonan aki entrante december proximo. Si esey sosode sin cu tin un solucion, HOH lo keda atrobe sin placa pa cubri su gastonan.
Situacion di trahadonan di HOH
Nan ta traha cada dia cu menos recurso, cu mas presion, y cu incertidumbre grandi. Nan no sa si nan trabou ta sigur, si nan bonus lo wordo paga, y si december lo trece mas problema. Y toch, nan ta sigui. Nan ta sigui cuida nos mama, nos tata, nos yiu, nos ruman. Cu profesionalismo, cu pasenshi, cu curason.
Nan merece claridad. Nan merece respet. Nan merece un ambiente di trabou stabiel, caminda nan por haci nan trabou manera nan sa hacie: cu dedicacion y cu dignidad.
Nos no por pidi tur cos di nan, mientras nos no ta duna nan e siguridad cu nan merece. Nan merece mas cu palabranan. Nan merece decision y accion!
Ta spera decision y accion di Gobierno
Den e comunicado aki mi no ta bay bisa kico e decision mester ta. Esey ta trabou di Gobierno, AZV y HOH pa haci a base di e resultadonan di e investigacion.
Loke SI mi ta pidi, cu determinacion, ta: Tuma accion! Tuma decision! Anto pronto. Ta inaceptabel pa habri aña 2027 sin claridad ni decision, mientras cu AZV tin intencion di cuminsa desconta adelantonan entrante december caba.
Ban spera cu na inicio di december e problema aki por keda resolvi, pasobra e tempo di warda a caba.
Related News
Gobierno a firma decreto ministerial pa duna comienzo na Carnaval 73
Diahuebs atardi storing a pone 2 transformer conecta cu planta di RECIP IV cay afo
Directie Infrastructuur en Planning ta anuncia fecha pa peticion di kavel den Aña 2027