DIP a pone 5 ora extra awe Diasabra pa entrega peticion pa Kavel di Carnaval

E aña aki tin 231 kavel

ORANJESTAD (AAN): Riba Diabierna e deadline a yega pa entrega peticion pa e rifa di mira kende lo hay un Kavel a lo largo di rutanan di Carnaval pa 2027.

   E sorteo mes lo bay ta Dialuna 16 di November venidero.  Sinembargo basa riba peticion di pueblo, DIP a dicidi haci un extension, y pesey lo habri portanan awe Diasabra 14 di november 2026 for di 8:00 am te cu 1:00 pm.  Pues cinco ora extra pa pueblo por haci entrega di nan peticion pa kavel.

   E maneho di 2026 ta keda vigente. Pa mas informacion tocante nos maneho por bishita nos website www.dip.aw unda e informacion ta publica. E maneho ta consisti di informacion detaya di proceso procedura pa bin na remarke pa haya un precario vergunning pa kavel.

   Desde e aña 2026 ta menciona nomber y fam di ganador di kavel, otro informacion di ganador no lo wordo publica pa proteha e privacidad di e ganador.

   Tambe nan kier a informa cu a agrega mas kavel pa publico. E aña aki lo tin 231 kavel total. Un parti di Linear Park lo ta kavel pa publico. Mester tene na cuenta cu esaki tin un midi mas chikito.

   Ta importante pa menciona cu e secuencia pa haya kavel lo keda mescos. Pa esnan cu ta desea di mira lista di ganador, por pasa libremente na oficina di DIP. E lista di ganador lo ta disponibel despues cu nos ricibi’e for di notaris.

   Con pa aplica:  (*) Formulario ta disponibel online na [www.dip.aw] pa download.  (*) Zegel/stampia ta disponibel na Post kantoor na balor di 4 Florin. (*) Yena e peticion completo y corecto, pega un zegel/stampia na dje. (*) Deposita esaki den e buzon corespondiente na loket di DIP na Sabana Blanco 68.

   Punto di atencion: Peticionnan cu ser entrega sin stampia of wordo yena incompleto  ta wordo considera invalido. Por cuminsa pone trailers 1 siman prome cu Carnaval, y mester kita trailers dentro di 1 siman despues di Carnaval. Na ganador di un kavel y vent kavel nos ta pidi pa cumpli cu regla cu nos ta pone den vergunning. Na ganador di un kavel y vent kavel por fabor manda un Identificacion valido y un prueba di persoonsnummer di belastingkantoor na This email address is being protected from spambots. You need JavaScript enabled to view it. y menciona e nummer di kavel ganador den e email.