Ta birando mas y mas dificil pa Gruponan di Mucha haya patrocinador pa Carnaval

Carnavalista Darren van Ommeren ta adverti

ORANJESTAD (AAN): E conocido Carnavalista Darren van Ommeren, kende te cu poco tempo pasa tabata lider di organizacion SMAC, e siman aki a emiti un advertencia faltando apenas par di dia pa temporada di Carnaval start oficialmente.

   Riba su pagina di social media, el a splica cla y raspa, cu Gruponan di Mucha cu ta bayendo Carnaval, ta coriendo peliger pa cancela participacion den Carnaval 73, specialmente paradanan di mucha planea pa 2027.

   El a bisa cu ta dificil pa e Gruponan aki haya sponsor.  El a bisa cu excepcion di Setar NV.  Pero hecho ta cu Gruponan di Mucha ta confrontando dificultad pa haya sponsor.

   E sugerencia di van Ommeren, ta pa sector priva, e.o. Hotelnan of gobierno di Aruba sostene e gruponan di mucha pa nan por sigui pusha pa participacion di muchanan den Carnaval. Pasobra e gastonan ta astronomico.

   Pa un Grupo di Carnaval bay cu mucha den parada, tin costonan, e.o. e costo di Banda Musical pa acompaña 3 parada di mucha.  Aki nan ta cobra entre 15.000 pa 30.000 Florin, y esaki ta djis un di e gastonan cu tin.

   Tur hende ta bisa cu tin amor pa cu esaki, pero SMAC y Gruponan so no por tin e amor ey.  Gruponan ta conta riba e yudansa di mayornan pa yuda nan inculca e spirito Carnavalesco den muchanan.  Tin sponsor cu ta acerca Gruponan, pero kier djis sponsor T-shirt, pero corda cu e Carnaval aki no ta un “Carnaval di T-shirt”.

   Na opinion di Darren, na final e ta den man di cada mayor pa pone e muchanan mes den Carnaval. Ta nan ta esun cu no kier paga p’e muchanan bay den parada.

   El a agrega: “Mi a caba di tende un storia cu Mayor a drenta na un Grupo y a vocifera cu carnaval ta su momento no di e muchanan. Con bo kier pa e muchanan bira Carnavalistanan di mañan?”

   Djis pone e muchanan den Parada Escolar no ta yuda cu e ideal ey.  Parada Escolar mester por existi como un ‘appetizer’ pa e muchanan haya gana di participa den Gruponan di Mucha pa mantene e luo den nos Carnaval di mucha.