Situacion financiero di Hospital ta keda un preocupacion grandi pa fraccion di MEP

Lider di MEP Evelyn Wever-Croes:

*Mester di solucion urgente! 

ORANJESTAD (AAN): E situacion financiero rond di Hospital, ta keda un preocupacion grandi pa fraccion di MEP. Principalmente e operacionnan cu no por continua. Tras di cada operación cu ta keda posponi, tin un hende, un famia y un vida cu ta wordo afecta. 

“Nos ta comprende cu gobierno kier investiga, pero nan mester bin cu solucion tambe na mes momento y no pone bida di hende na peliger”. 

Ora un hende no por haya e tratamento medico cu e mester, e consecuencia tabay mucho mas leu cu su salud. E ta afecta su posibilidad pa traha, sostene su famia y disfruta un calidad di bida digno. 

Pa MEP, ta esencial pa gobierno presenta un vista cla di e situacion actual: cuanto pashent ta wordo afecta, cuanto operación ta keda pendiente y cua medida urgente ta wordo tuma pa atende e necesidadnan aki. 

Investigacion ta importante, pero no por keda solamente na investigacion. Mester tin informacion transparente, un plan concreto y acción pa garantiza cu hende por haya e atencion medico cu nan mester. E siman aki nos lo reuni cu Hospital pa sigui atende e problema pa por yega na un solucion. 

Den Gabinete Wever-Croes nos a traha cu dedicación pa fortalece nos sistema di salud publico y crea condicionnan pa un sistema mas sostenibel. Mi kier expresa mi sincero gradicimento na tur profesional di salud, funcionario publico y colaborador cu a contribui na e trabou aki. Nos ta reconoce y balora cada esfuerso. Hunto nos mester sigui mehora cuido di salud. 

Salud no ta un luho. E ta un derecho y un prioridad. Nos compromiso mester keda cu e pueblo y cu cada persona cu ta sperapa recupera su salud y sigui cu su bida.