Weekend di Accion Policial grandi controlando casi 650 auto

Hendenan haya cu droga y arma blanco

• Diabierna a controla 400 auto y Diasabra tabata 245
• Hubentud ta sali bay caya cu atributonan den nan poder 

ORANJESTAD (AAN): Unidadnan di Polis di distrito Oranjestad, tabata Diabierna atardi pa anochi cu un control pisa den trafico, y esaki bao auspicio di Ministerio Publico, a combina esaki cu listramento preventivo.

   Resultado di tur esaki, ta cu Polis a para un total di 400 auto pa controla.  A controla tur cos cu un automobilista mester tin na ordo pa por core riba caya.

   En total, Polis a duna 95 boet, a haci 7 detencion, y a confisca droga, arma blanco, y tambe huls.  E patruyanan a para na diferente punto strategico durante control.

   E boetnan tabata pa entre otro; rijbewijs, impuesto di plach’i number, seguro, keuringskaart, etc.

   Durante e control polis uniforma a haci dos detencion pa no tin permiso di estadia, dos detencion pa maneha bao influencia y un detencion pa posesion di droga (marihuana).

   Tambe polis di Unidad Motorisa durante listramento preventivo a topa den un auto un skinops (boksbeugel). E chauffeur a wordo deteni pa posesion di arma blanco.

   Despues polis a sigui controla den diferente bario y establecimento nocturo te den oranan di madruga.  DIARIO a compronde cu durante e accion di listramento preventivo a haci detencion pa cu posesion di municion, a confisca machete, sker y cantidad di droga.

   E accion y control den trafico a sigui pa e siguiente anochi di Halloween den diferente distrito.  Pa dianan venidero, corda percura pa bo documentonan di bo vehiculo di motor ta valido y bo rijbewijs tambe. Bo ta bebe no stuur. Percura pa bo tin bo amigo responsabel cu bo tur momento.  Cuerpo Policial Aruba ta keda enfatisa cu un trafico sigur ta responsabilidad di nos tur.