Fin di siman aki ta uno preventivo di cero tolerancia

Pa siguridad di tur hende

ORANJESTAD (AAN): Riba Diabierna atardi, Cuerpo Policial Aruba a indica cu nan lo tin e fin di siman aki accion preventivo di ‘O Tolerancia’.

   Den cuadro di celebracion di Halloween na Aruba, na unda cu lo tin diferente actividadnan rond di e isla, Polisnan tambe lo tey presente pa asina controla y mantene e orden publico. Lo tin accion policial y lo actua na unda cu mester pa siguridad di nos comunidad y bishitantenan.

   Polisnan ta bon prepara e fin di siman aki y preventivamente lo ta activo for di pariba te cu pabou. Nos ta haci un suplica na nos comunidad pa Busca bo Amigo Responsabel awe mes! No warda te na ultimo!

   Percura cu bo documentonan ta na ordo y semper tin bo rijbewijs cu bo pa preveni un boet cayente! Bo pia ta pisa, mantene liviano.

   Baha bo velocidad y maneha trankilo pa bo yega bo destinacion sigur pa preveni desgracia of pa ricibi un suma halto di boet. Comporta bo mes e fin di siman aki pa bo no mester haya bo mes den problema cu Husticia sin mester.

   Polis lo ta riba caya cu nan aparatonan di ‘Intoximeters’ pa laga tur chauffeur supla pa check e nivel di alcohol den sanger.