Ministro Wendrick Cicilia contento cu lo tin vuelo adicional di TUI

Impulsando mercadeo Europeo

ORANJESTAD (AAN): Aerolinea TUI lo aumenta su frecuencia pa Aruba di dos pa tres vuelo pa siman entrante April 2027. Esaki ta un di e desaroyonan destaca durante e bishita di Minister di Turismo, Labor y Transporte, mr. Wendrick Cicilia, na e oficina principal di TUI na Den Haag, hunto cu director di Aruba Tourism Authority (ATA), Ronella Croes, demas ehecutivonan di ATA y conseheronan di su ministerio.

Den un entrevista na TUI, Minister Cicilia a subraya cu e compania ta un partner strategico pa e conectividad entre Aruba y Europa, cu un relacion di mas cu 20 aña.

   Segun e mandatario, e aumento di frecuencia ta forma parti di un perspectiva mas amplio pa fortifica e mercado Europeo. Ademas di e di tres vuelo pa siman, tin plannan pa sigui crece den futuro te cinco vuelo pa siman. Tambe ta explora diferente combinacion di ruta cu Bonaire y posibilidadnan pa mas trayecto directo. E opcionnan aki ainda no ta un programacion confirma.

   Aumento den marketing: Minister Cicilia a splica cu, den e strategia di diversificacion turistico, Aruba a aloca 35% mas den e presupuesto di mercadeo y inversion pa e mercado Europeo, considerando su potencial.

   El a destaca cu e turista Europeo ta keda mas largo na nos isla, tin un poder adkisitivo mas halto y ta mustra interes den naturalesa, cultura y experencianan local. E intencion ta pa desaroya un turismo di mas balor, cu ta contribui na economia y amplia e oportunidadnan pa diferente sector y area di Aruba.

   Segun Cicilia, e importancia di TUI ta bay mas leu cu e mercado Hulandes. Via su red Europeo, e compania ta contribui na conecta Aruba cu mercadonan manera Alemania, Suisa, Italia, Inglatera y Spaña.

   E minister a indica tambe cu ta traha, hunto cu ATA, riba posibilidadnan pa un conexion directo cu Suisa. Paralelamente, tin combersacionnan cu Spaña pa sigui stimula e mercado ey.

   Oportunidad pa San Nicolas y Oranjestad: Den su entrevista, Minister Cicilia a menciona cu ta traha riba un maneho pa e oferta di acomodacion den areanan manera San Nicolas y Oranjestad. E meta ta pa crea mas opcion pa bishitantenan Europeo cu ta busca un experencia cultural y contacto cu naturalesa.

E vision ta pa amplia e oferta turistico di Aruba y duna bishitantenan mas oportunidad pa conoce diferente parti di e isla, participa den actividadnan local y prolonga nan estadia.

   Crecimento kizas di 16%: Di su banda, director di ATA, Ronella Croes, a indica cu tin un proyeccion di crecemento di 16% pa e mercado Europeo. El a subraya cu e vuelo adicional di TUI, cuminsando na april proximo, ta un señal positivo pa e conectividad di Aruba. El a subraya cu TUI, hunto cu KLM, ta representa un parti importante di e capacidad di asiento entre Hulanda y Aruba. Mantene un dialogo cercano cu e partnernan aki ta esencial pa sigui desaroya e mercado Europeo.

   Segun Ronella Croes, e enfoke no ta solamente riba solo, lama y beach. ATA ta busca pa stabilisa e volumen di bishitante y sigui crece cu un oferta cu ta inclui cultura, evento y estadia mas largo, entre otro den Oranjestad. Calidad, diversificacion y turismo responsabel ta central den e acercamento aki.

   TUI expande biahe cu acomodacion: E director comercial di TUI, Luc Lentjes, a califica e reunion cu e delegacion Arubiano como masha positivo. El a expresa satisfaccion cu nan a tuma tempo pa bishita e oficina, haci un recorido cortico y intercambia idea tocante e desaroyo di Aruba. Durante e encuentro tambe a resalta e iniciativanan di TUI Care Foundation.

   Tocante e frecuencia adicional pa e temporada di zomer venidero, el a menciona un programacion cu dos vuelo directo for di Amsterdam pa Aruba y un regreso directo for di Aruba pa Amsterdam.

   Ademas, TUI ta busca pa amplia su oferta di acomodacion riba e isla, incluyendo apartamento y condominio. Cu esaki, e compania kier ofrece mas alternativa pa bishitantenan cu diferente presupuesto y preferencia, incluyendo esnan cu ta busca opcionnan mas economico.

   TUI fly Nederland ta un aerolinea cu tin un relacion di mas cu 20 aña cu Aruba. E ta parti di TUI Group, un grupo internacional di turismo. TUI ta bende tanto ticket di avion como paketenan di vakantie cu vuelo y hotel. E aerolinea a cuminsa na aña 2005 cu e nomber Arkefly, relaciona cu e marca di biahe Arke. Despues, den e proceso di uni e diferente marcanan bao un solo identidad internacional, e nomber a cambia pa TUI fly. Arke y Holland International tambe a pasa pa e marca TUI durante 2015 y 2016.

TUI fly a cuminsa opera na Aruba na november 2005. Dia 3 di november 2025, e compania a celebra e conexion di 20 aña cu un vuelo special for di Schiphol. Aruba Airport Authority a reconoce TUI como un partner confiabel cu a contribui na turismo, pero tambe na biahenan di studiantenan, famianan y profesionalnan entre Aruba y Hulanda.

  Su importancia pa Aruba ta cu e compania tin tanto e avion como e canal di benta di vakantie. TUI ta ofrece alohamiento na hotelnan manera RIU, Divi, Renaissance y Courtyard by Marriott, pero tambe na establecimentonan mas chikito manera Paradera Park, Arubiana Inn y Del Rey Apartments. Esaki ta trece e oferta turistico di Aruba directamente dilanti di e consumidor Hulandes. E vuelonan pa Aruba ta wordo efectua cu Boeing 787 Dreamliner.