Radarnan di costa fo’i funcion ta un cambio grandi di maneho

Parlamentario Rocco Tjon ta cuestiona Gobierno:

 *Acaso esaki a wordo haci deliberadamente of no 

ORANJESTAD (AAN)-- Den un entrevista cu Parlamentario Rocco Tjon, di fraccion di Partido Movimento Electoral di Pueblo (MEP), tocante e tema di Siguridad na Aruba, el a cuminza expresando “Mi ta preocupa, pasobra pueblo ta preocupa”.

El a señala cu tin un cambio grandi pa loke ta maneho.

   “Na momento cu nos a traspasa e mando pa e gobierno actual, nos a duna nan no solamente tur e dossiers,  tur e proyectonan cu ta andando, pero tambe nos a duna nan tur e cartanan di tur e departamentonan hudicial, den cual nan a vocifera por escrito e preocupacion di e recorte di 10% den e presupuesto, y kico e consecuencianan di tur esaki ta bay ta”, Parlamentario Tjon a indica.

   El a bisa cu algun luna atras, hasta Ministerio Publico a manda un carta por escrito den cual nan a vocifera nan preocupacion financiero. “Ora bo corta 10% den un presupuesto, sin haci un analisis apesar cu tur departamento ta splica bo kico e consecuencia ta bay ta, y toch bo ta haci esaki, awo nos ta mira e consecuencia aki. Banda si esaki, sigur un cambio grandi pa loke ta maneho, ta e parti cu e radarnan no ta funciona, esey ta un hecho y mi ta keda stress riba e topico aki. Otro medionan di comunicacion a bisa cu ami ta iresponsabel door cu a trece esaki padilanti, ami ta kere cu esun mas iresponsabel ta e mandatario cu a permiti pa e radarnan aki no funciona mas” Parlamentario Rocco Tjon a cuestiona.

   Na October 2025, Parlamentario Tjon a señala y keda stress riba esaki tambe, ora e gobierno aki tabatin seis luna na mando caba, full e Parlamento a haya un rond-leiding den e “Operation Command Center” na Savaneta. “E polisnan mes a splica nos con e tecnologia aki ta percura pa aumenta e siguridad di bo, di mi, di nos tur, con ta aumenta nan propio siguridad. Y despues, na 2026, ora nan ta na mando, e radar aki no ta funciona mas?” Tjon ta cuestiona, y el a menciona cu esaki ta pon’e pensa cu kizas, deliberadamente, a saca e radarnan for di funcion, pasobra tabata un proyecto di e gobierno anterior. “Anto, e ora ey mi ta bisa cu ta un falta di responsabilidad, di seriedad, y obviamente esaki ta un cambio di maneho grandi”, Parlamentario Rocco Tjon a remarca.