Den casi 12 aña di operacion ANSA e aspecto di siguridad Trafico Aereo di Aruba ta campeon

Director di ANSA Nilky Kock:

• Esaki ta e rekerimento internacional y nacional di mas importante 

ORANJESTAD (AAN)- Diaranzon 21 di October a keda observa e Dia Internacional di Controladornan aereo. Nilky Kock, kende ta Director di “Air Navigation Services Aruba NV” (ANSA), den entrevista cu DIARIO a expresa cu e celebracion di Dia di Controlador Aereo ta importante, como cu e ta un funcion di hopi responsabilidad. 

   “E ta un dia importante mirando cu nos personal di ANSA, ta controladornan di trafico aereo. Esaki ta e dia cu ta wordo celebra e Dia Internacional di Controladornan di Trafico Aereo, y e aña aki ta 65 aña cu e ta wordo conmemora mundialmente. Pues e ta un dia importante pa ANSA mirando cu e ta e Dia di mayoria di nos trahadornan”, señor Kock a expresa.

   El a trece dilanti cu e compania a cuminza opera como ANSA dia 1 di Januari 2015, pues e tin 11 aña bayendo pa 12 aña caba. Con e casi 12 añanan aki a transcuri pa ANSA? “Pues, na cuminzamento manera tur organizacion jong tin su ‘kinderzitjes’ pero na caminda nos a mehora y aworaki mi por bisa cu hopi certeza, cu nos ta un organizacion cu a madura den tur aspecto di palabra. Specialmente, pa loke ta e aspecto di seguridad cu ta e rekerimento internacional y nacional di mas importante pa loke ta e control di trafico, mi por bisa cu nos ta campeon riba esaki aworaki”, Nilky Kock, director, orguyosamente a expresa.

   El a duna di conoce cu diaranzon ANSA a cuminza cu un auditoria di parti d Aviacion Civil, hunto cu otro instancianan di Reino. Lamentablemente, pa ANSA nan a enfoca e biaha aki solamente un di su unidadnan, cu ta ‘Aeronautica Information Affairs’. “Nos lo a prefera si nan a audit full ANSA, mi ta sigur cu nos lo a sali hopi bon di dje”, Kock a señala. Con ANSA ta ubica compara cu paisnan grandi?

   “Por ta, compara cu paisnan grandi nos no tin e nivel di experiencia ey. Manera mi a caba di bisa nos ta un organizacion jong, pero si mi compara nos cu paisnan den region y esnan di nos grandura, mi por bisa cu ANSA ta ehemplar den esey. Nos a inverti asina hopi placa, cu mi por djis menciona cu mas cu diez miyon, den e ultimo añanan, den loke ta ekipo nobo, of renova ekiponan existente, pues den e parti ey nos ta top den ekipo, den formanan di traha, nos procedimentonan. Nos tin un sistema di ‘safety quality management systems in place’ cu ta asegura cu bo ta keda mehora continuamente, tanto pa loke ta e aspecto di seguridad como tambe den eficiencia di duna calidad di servicio”, señor Nilky Kock, director di ANSA a relata.