Aruba lo ta presente na celebracion historico di 250 aña di The First Salute na St. Eustatius

ORANJESTAD (AAN): Prome Minister Mike Eman lo bishita St. Eustatius na November venidero,

y esaki den cuadro di e conmemoracion di 250 aña di The First Salute, un acontecimento historico cu a duna e isla un luga importante den historia di Merca. E celebracion lo tuma luga dia 16 di november 2026, un dia prome cu e prome Kingdom Summit na St. Maarten, unda Prome Minister Eman tambe lo participa. Eman a destaca cu St. Eustatius, a pesar di su tamaño chikito, a desempeña un papel importante den un acontecimento cu posteriormente a haya reconocimento internacional.

   Riba fecha 16 di november 1776, poco luna despues cu Merca a proclama su independencia, e bapor Mericano Andrew Doria a yega na St. Eustatius cu e bandera di e nacion nobo. Ora e bapor a duna un saludo di cañon, Fort Oranje a contesta cu un saludo similar. E acto aki, conoci como The First Salute, ta considera e prome saludo oficial na e bandera Mericano door di un poder stranhero. E acontecimento a representa un reconocimento simbolico di e nacion nobo y a duna St. Eustatius un posicion special den historia di independencia di Merca.

   E conmemoracion di 250 aña di The First Salute lo conta cu presencia di Rey Willem-Alexander, Prome Minister di Hulanda Rob Jetten y Secretario di Estado Eric van der Burg. Prome Minister Eman a expresa e expectativa cu representantenan di nivel halto di Merca tambe por participa den e celebracion historico.

   Eman a referi na Sint Eustatius como un isla ruman di Aruba, cu cual nos pais ta comparti diferente laso historico y cultural. Un di e similaridadnan special entre e dos islanan ta cu ambos pais nan ciudad capital ta carga e mesun nomber, Oranjestad. Eman a destaca tambe e bon relacion cu e representantenan di Sint Eustatius y e importancia di reconoce e contribucion historico cu e isla a haci.