Asociacion ACTAA a observa Dia di Controlador di Trafico Aereo’ y a anuncia directiva nobo

ORANJESTAD (AAN): Riba Diamars, 20 di october 2026, e Asociacion di Controladornan di Trafico Aereo di Aruba (ACTAA) a

uni pa celebra e “Dia Internacional di Controlador di Trafico Aereo”. E conmemoracion aki ta brinda un oportunidad pa reconoce y honra e labor esencial di e profesionalnan cu diariamente ta responsabel pa guia y coordina e trafico aereo, contribuyendo na siguransa, orden y eficiencia den nos espacio aereo.

   Tur dia, miles di pasahero ta haci uzo di Aeropuerto Internacional di Reina Beatrix pa cuminsa of finaliza nan viahe. Tras di cada take-off y aterizahe tin un bos cu ta resona tras di e mic. A pesar cu e labor aki ta tuma luga mayormente fo’i bista di publico, e controladornan ta hunga un rol esencial den e siguransa y eficiencia di trafico aereo.

   Control di Trafico Aereo ta un profesion importante pa e siguransa di aviacion. E labor ta demanda precision, comunicacion efectivo y capacidad pa tuma decisionnan critico bou di presion. P’esey, riba Diamars nan a honra e controladornan di trafico aereo y crea mas conciencia tocante e importancia di nan labor pa e siguransa di aviacion.

   Asociacion ACTAA a wordo crea na aña 1989 y actualmente tin un total di 28 miembro activo cu ta forma parti di e asociacion. ACTAA su mission y vision ta pa representa y defende e interes nan di tur controladornan di trafico aereo na Aruba den un manera responsabel, professional y eficiente.

   Hasiendo uso di nan laso nan internacional como miembro di “IFATCA“ (International Federation of Air Traffic Controllers Associations), pa yuda fortalece y mehora e calidad di servicio, door di keda na altura di e ultimo inovacion y mehoracion nan cu ta tumando lugar mundialmente den nos ramo, y asina sugeri e cambio nan mas alcaso cu por wordo adapta na Aruba, pa asina segura cu e controladornan local tin e mihor tools pa traha comodamente, dunando e mihor servicio posibel.

   Directiva nobo: Como parti di su compromiso continuo pa representa y defende e interesnan di e controladornan di trafico aereo di Aruba, ACTAA ta anuncia oficialmente su directiva nobo, elegi durante su Asamblea General di Miembronan, teni dia 17 di september 2026.

   E Directiva nobo ta consisti di e siguiente miembronan. President ta Donald Arends.  Vice-president ta Urwin Lumenier.  Secretaria ta Geraldine Laclé-Erasmus.

   Como Tesorera tin Christine (Kitty) Tromp-Dammers.  Como Comisario tin Renato Solognier.

   E Directiva nobo di ACTAA ta enfoca su gestion riba e fortalecimento di e asociacion, e desaroyo profesional di su miembronan y e cooperacion cu e sector di aviacion na Aruba.

   ACTAA ta reafirma su compromiso pa representa y defende e interesnan di su miembronan, promoviendo un ambiente profesional basa riba respet, colaboracion y excelencia.

   Na nomber di e Directiva di ACTAA, nan ta felicita tur e controladornan di trafico aereo na Aruba y rond mundo. Nan ta reconoce y aprecia profundamente boso dedicacion, profesionalismo y compromiso diario cu boso ta brinda den boso trabou y pa pais Aruba. Feliz Dia Internacional di Controlador di Trafico Aereo 2026.