Awe e drama musical ‘Fiesta den Cunucu’ ta cuminza na Scol di Arte San Nicolas

Milta Angela di e Comite di Aruba:

ORANJESTAD (AAN)-- No solamente den Centro di Bario Savaneta, e drama musical “Fiesta den Cunucu” ta bay tuma lugar,  pero señora Milta Angela, den entrevista cu DIARIO, a menciona e fecha y lugarnan exacto unda e show infantil aki lo wordo presenta.

  Milta Angela ta forma parti di e Comite di Aruba cu ta bin cu e show infantil aki, for di Corsou.

   “E Fiesta den Cunucu” aki ta bay tin diferente presentacion na Aruba, cuminzando awe, Diasabra 10 di October ta esun prome na Scol di Arte San Nicolas, y lo bay tin dos presentacion: uno pa 2’ or di atardi, y e otro pa 6.30’or di atardi.

“E siguiente ta Diadomingo 11 di October, na EPB Oranjestad. Tambe lo tin dos funcion atardi, pa 2’or y 6.30 or.

Diamars 13 di October e fiesta ta sigui, na Centro di Bario Savaneta, pa 6.30 or di atardi. Y Diaranzon 14 nos ta akinan mes na Centro Famia Piedra Plat, pa 6.30 or di atardi”, señora Milta Angela a duna di conoce.

   “Nos ta akinan pa anima e pueblo di Aruba, pa bin goza di un show infantil enormemente bunita, colorido, cu gozo, cu e muchanan lo keda contento di un gran cantidad di animal di hardin.

   Prijs di entrada ta minimal y muchanan bao di tres aña no mester di stoel y nan no ta paga”, señora Angela a menciona.

   Señora Angela ta invita tur hende pa ta na tempo, pa asina cuminza na ora.

“Mi ta invita muchanan, hoben, mayor, famia completo pa bin presencia y goza di e show infantil musical ‘Fiesta den Cunucu’. Nan lo wordo yama bon bini for di Diabierna cu 35 actor a yega Aruba, pa nan presentacionnan” Milta a expresa, y a gradici Telearuba y tur otro media, cu a pone e fiesta aki na caminda.