Task Force ta cuminsa accion pa kita autonan bandona for di tereno publico

Maikel Gomes di Bureau City Inspector:

ORANJESTAD (AAN): Ministerio di Asuntonan General, hunto cu Cuerpo Policial di Aruba (KPA), Bureau City Inspector y otro instancianan di Gobierno, a forma un Task Force pa atende e problema di autonan bandona riba tereno y camindanan publico. 

Maikel Gomes di Bureau City Inspector a informa den un entrevista cu DIARIO cu e accion a cuminsa na Oranjestad y cu den e dianan aki lo cuminsa kita e autonan identifica. 

Segun Gomes, algun luna pasa Gobierno a encarga Bureau City Inspector cu un analisis di e situacion. E inventario di Oranjestad ta completa awor y esaki ta permiti cu e fase di kita e autonan bandona por cuminsa. 

Gomes a califica e situacion como preocupante y hasta alarmante, mirando e cantidad di keho cu tanto Bureau City Inspector como Cuerpo Policial ta ricibi regularmente. Entre otro, tin autonan bandona cu ta causa obstruccion y stroba trafico riba camindanan publico. 

“Den transcurso di ultimo temponan e situacion a bira asina alarmante cu a decidi, hunto cu Ministerio di Asuntonan General, Cuerpo Policial, Bureau City Inspector y demas partnernan, pa forma un Task Force,” Gomes a splica. 

Manera a wordo anuncia anteriormente door di Cuerpo Policial, autonan cu mester wordo kita lo ser transporta cu takelwagen pa un bergplaats. E gastonan relaciona cu esaki y deposito di e vehiculo lo ta riba cuenta di e doño. 

Gomes a enfatisa cu doñonan di autonan bandona mester actua y kita nan vehiculo for di terenonan publico. Si esaki no sosode, Cuerpo Policial lo procede cupa kita e autonan aki. 

E accion ta cuminsa na Oranjestad, pero intencion ta pa despues sigui den otro barionan di Aruba, cu e meta di atende e problema y contribui na un ambiente publico mas limpi y ordena.