Mas di 2.000 hende a aplica pa purba cumpra un di 20 cas disponibel

Tin necesidad urgente di vivienda den comunidad

• Gran interes pa campaña hipotecario ‘Yabi den bo man’ 

ORANJESTAD (AAN): Cu tin necesidad grandi pa vivienda na Aruba, a keda claramente bisto door di FCCA recientemente.  Nan a pone 20 cas na benta, y mas di 2.000 hende a aplica pa cumpra uno.

   FCCA ta mira bek cu satisfaccion riba e gran interes cu comunidad a mustra den su campaña hipotecario “Yabi den bo man’ pa benta di 20 cas. E campaña a dura dos siman y FCCA a ricibi mas cu 2.000 aplicacion.

   E campaña “Yabi den bo man” ta un proyecto unico cu ta consisti di 17 ‘cas den rij’ na Rooi Bosal y 3 ‘cas para riba nan mes’ na Shaba. E casnan aki lo wordo entrega na e doño di cas, completamente cla. FCCA lo construi e casnan aki y lo entrega e cumprado e “Yabi den su man”.

   E cantidad grandi di aplicacion ta mustra cu e campaña a logra yega na nos comunidad. Na mes momento, esaki ta confirma e necesidad urgente y creciente di un Vivienda na un prijs rasonabel.

   Proceso di evaluacion y seleccion: FCCA ta consciente cu cada aplicacion ta representa e deseo di un persona of famia pa un cas propio. Manera informa e aplicacionnan a wordo procesa segun e orden den cual nan a drenta. Den e proceso di evaluacion, FCCA ta controla si e solicitante: (*) A entrega tur documentacion rekeri y valido. (*) Ta cumpli cu e criterianan di elegibilidad. (*) Tin e capacidad financiero necesario pa cumpli cu e obligacionnan hipotecario.  (*) A pasa e proceso di screening.

   E prome 20 solicitantenan cu a aplica y a cu cumpli cu tur e condicionnan, lo bin na remarca pa un di e 20 casnan disponibel. Si un solicitante no cumpli cu e condicionnan, lo sigui cu e siguiente aplicacion den e secuencia.

   FCCA ta den proceso pa evalua e 20 solicitantenan. Nos ta pidi tur solicitante pa tene cuenta cu e proceso di evaluacion mester wordo completa prome cu por comunica un resultado definitivo.

   Tur solicitante lo ricibi un contesta: Durante e proximo dianan FCCA lo tuma contacto cu tur persona cu a aplica pa un cas, esey ta encera tur esnan cu a cualifica y cu no a cualifica. Tene na cuenta, cu FCCA mes lo tuma contacto cu e persona cu a aplica.

   Mas proyecto di vivienda den futuro: Aunke e proyecto aki ta conta cu solamente 20 cas, e cantidad grandi di aplicacionnan ta duna un señal cla tocante e demanda existente. FCCA ta reconoce e necesidad urgente di mas vivienda y lo sigui traha activamente riba otro proyectonan di vivienda den futuro.

Solicitantenan cu cualifica, pero cu no cay den e prome 20, nos ta recomenda nan pa sigui medionan social pa informacion tocante nos proyecto y oportunidadnan den futuro.

   FCCA ta gradici comunidad pa e confianza y e interes grandi den e campaña “Yabi den boman”. FCCA ta compronde e importancia di vivienda propio pa bienestar y stabilidad di cada famia, y lo sigui comprometi nos mes na crea mas oportunidadnan di vivienda pa nos comunidad.