Hoben di 15 aña deteni despues di hinca dos persona na San Nicolas

Pelea a resulta den hincamento

*un victima di 14 aña a haya herida na su nek y e otro na su cabes

ORANJESTAD (AAN):  Un pelea na altura di un bushalte na Caya Jose Geerman na San Nicolas a resulta den dos hoben hinca cu cuchiu diamars atardi. Un mucha homber di 15 aña a wordo deteni como sospechoso den e caso.

Segun informacion di Cuerpo Policial, pa mas o menos 2’or di merdia Central di Polis a recibi un yamada cu un pelea tabata tuma lugar na e sitio menciona. E prome informacion tabata indica cu dos hoben a wordo hinca cu un cuchiu.

Patruya di San Nicolas, hunto cu diferente unidadnan di polis, a wordo manda mesora pa e lugar. Tambe a wordo despacha un unidad di ambulance.

Na yegada di e prome patruya, polis a confirma cu dos persona tabata hinca. Un di nan ta un mucha homber di 14 aña, kende tabata tin un herida di cuchiu na su nek. E otro victima ta un mucha homber di 18 aña, kende a sufri un hinca na su cabes.

Personal medico a brinda e dos victimanan asistencia na luga. Despues, un di nan a wordo transporta pa Imsan, mientras e victima di 14 aña a wordo transporta pa Hospital Dr. Horacio Oduber.

Polis a actua rapidamente y a logra detene e sospechoso, un mucha homber di 15 aña. E hoben a wordo transporta pa Warda di Polis na San Nicolas, unda a present’e dilanti di un sub-fiscal. Posteriormente, el a keda deteni y e caso a pasa pa Departamento di JZP, cu ta encarga cu e investigacion.

Cuerpo Policial Aruba ta indica cu e ta tuma e tipo di incidentenan aki hopi na serio, specialmente ora ta trata di hobennan menor di edad.

Segun e ultimo informacion disponibel, condicion di ambos victima ta stabiel.

Polis ta haci un yamada na persona cu a presencia e incidente of cu tin informacion relevante pa comunica esaki na tiplijn 11141. Segun polis, e persona por keda anonimo.