‘Caribe mester pasa di reaccion pa preparacion contra sargassum’

Parlamentario Otami Thomasia di AVP:

ORANJESTAD (AAN): Sargassum ya no ta solamente un problema cu ta afecta beach; e ta un reto regional cu tin consecuencia directo pa turismo, pesca, salud publico, biodiversidad y presupuesto di Gobierno. P’esey, Aruba y e resto di Caribe mester pasa di reaccion di emergencia pa un estrategia permanente di preparacion y prevencion.

   Informacion presenta na Parlamento Latinoamericano y Caribeño, Parlatino, ta indica cu 2026 ta un aña atipico, cu volumen grandi di sargassum cu ta pone presion serio riba henter region. E impacto ta inclui daño na coral, manglar y yerba marino, interrupcion di pesca, dificultad pa acceso na beach, gastonan recurrente di limpiesa y molester respiratorio causa pa gasnan cu ta libera ora e sargassum ta descompone.

Segun parlamentario di Fraccion di AVP y presidente di Comision di Caribe di Parlatino, Otami Thomasia, e debate no por limita su mes na con pa limpia sargassum ora e yega costa.

   “Nos mester pasa di reaccion pa preparacion. Sargassum no ta un incidente aisla cu nos por atende solamente ora e yega beach. E ta un fenomeno repetitivo cu ta exigi planificacion, conocemento cientifico, recurso financiero y cooperacion entre diferente instancia,” Thomasia a declara.

   Esaki ta nifica inverti den monitoreo continuo y sistema di alerta trempan, cooperacion cientifico y tecnico, protocolo pa recoleccion y maneho sigur, investigacion, tecnologia y un sistema nacional cu ta defini claramente ken ta responsabel pa cada parti di e proceso.

   Resolucion 7/4 di Asamblea di Medio Ambiente di Nacionnan Uni, UNEA, ta pidi mas cooperacion internacional y apoyo pa paisnan afecta pa desaroya medida y plan nacional y regional. E enfoque bou di Convencion di Cartagena tambe ta identifica gobernanza, investigacion, reaccion operacional, comunicacion y financiamento como elementonan esencial.

  Caribe ya tin un plan di accion y un grupo di trabao dedica na e tema. E reto awor ta transforma e acuerdonan regional den capacidad real na nivel nacional.

  “Un documento regional tin balor solamente ora cada pais traduci su compromiso den preparacion concreto. Aruba mester sa ken ta monitorea, ken ta coordina, ken ta recoge, con e material ta wordo transporta y almacena, y di unda e financiamento lo bin. Responsabilidad mester ta defini prome cu e sargassum yega nos costa,” Thomasia a enfatisa.

   Den e cuadro aki, Thomasia a manda preguntanan parlamentario na minister encarga cu naturalesa, Mike Eman, y Minister di Turismo, Wendrick Cicilia. E kier haya claridad tocante e accionnan cu Aruba ta tumando, existencia di un plan nacional, division di responsabilidad entre departamentonan, monitor y alerta trempan, protocol pa recoleccion, transporte y almacenamento, financiamento y cooperacion regional.

   E parlamentario ta pidi tambe informacion tocante e impacto potencial riba turismo, ecosistemanan y salud publico, como tambe e posibilidad pa inverti den investigacion y solucionnan sostenibel.

Un otro aspecto cu merece investigacion ta e posibilidad pa crea balor economico for di sargassum. Innovacion tecnologico, desaroyo di cadena di balor y economia azul por forma parti di e solucion, pero cualkier iniciativa pa procesa of reutilisa sargassum mester basa riba evidencia cientifico, regla cla y salvaguardia ambiental y di salud.

   Parlamento, segun Thomasia, tin un rol importante pa crea e base legal necesario, asegura financiamento, exigi transparencia y duna stabilidad na un estrategia cu no ta depende solamente di medidanan di emergencia.

   “Sargassum no conoce frontera. Nos reaccion tampoco por keda limita pa frontera. E momento ta pa prepara, coopera y actua prome cu e crisis yega nos costa,” Thomasia a conclui.