Hof a condena Otmar Oduber na 2 aña di prizon

||| Pa 5 aña e no por postula como politico

• Acusado Esser condena na 240 ora trabao comunitario
• Acusado Wever no a haya castigo 

ORANJESTAD (AAN): Diahuebs via video conference, Hof di Corte Superior a dicta sentencia den caso Flamingo. Tabatin basta hende presente pa scucha e sentencia. Esser no tabata presente pasobra e tabata na Colombia. Su abogado mr. D. Croes si tabata presente.

   Exigencia di PG: Ta asina cu durante tratamento di e caso na Juni 2026, Procurador General (PG) a exigi pa Wever 240 ora di trabao of 120 dia cera den prizon y 6 luna di prizon condicional cu 3 aña di prueba.

   Pa e acusado Esser, PG a exigi 18 luna di prizon, mientras cu pa Otmar Oduber, PG a exigi 3 aña di prizon y 6 aña e no por postula como politico.

   Sentencia di Hof: Riba Diahuebs, Hof a bisa cu e sentencia ta otro cu e sentencia di Corte den Promer Instancia. Hof a declara Oduber un parti liber den caso Malmok. Hof a declara Otmar liber den caso trahadornan fantasma pero no pa Thiel y Phillip. Hof a declara Esser liber di a wordo cumpra pa Vito Croes. Hof ta haya cu Esser a abusa di su funcion.

   Hof a declara Wever un parti liber den caso Malmok. Hof ta haya cu Wever a falsifica cartanan y a abusa di su funcion, y a haye complice abuso funcion.  Pero Wever a ser declara liber pa cu pasa tereno na Malmok, pero pero si culpabel falsifica carta y abuso di funcion.

   Castigo:  Hof ta haya cu Oduber a malversa Gobierno, a abusa di su funcion y a wordo cumpra. Hof a condena Oduber na 2 aña di prizon y cu pa 5 aña e no por traha como ambtenaar di Gobierno y tampoco por postula como politico

   Hof ta haya cu Esser culpabel di a wordo cumpra y a abusa di su funcion door di facilita trabao na esnan cu ta afilia na Partido POR. Hof a condena Esser na 240 ora di trabao.

   Hof ta wordo haya culpabel di a traha cartanan falso pero door di e situacion cu mester a sigui orden di Oduber, Hof no ta impone castigo.

   Por a mira cu Oduber, for di momento cu Hof a bisa cu e ta wordo haya culpabel, a baha su cabez y a keda wak abao cu wowonan sera. Despues di e sentencia, ainda Oduber a keda sinta cabez abao pa algun rato. Esey ta indicacion cu e sentencia a afecta Oduber hopi.