Gobierno cu peticion na corte pa pospone caso entama pa Aruba Birdlife Conservation

ORANJESTAD (AAN): Gobierno di Aruba a cumpli cu e compromiso haci cu guianan y operadornan di UTV/ATV pa

crea mas espacio pa dialogo y busca un solucion prome cu e caso pendiente yega dilanti hues. Minister di Vivienda, Infrastructura, Servicio Interno y Telecomunicacion Rene Herdé a confirma cu Gobierno formalmente a solicita Corte pa pospone e kort geding inicia pa Aruba Birdlife Conservation (ABC).

E peticion ta sigui riba e dialogo cu Gobierno a tene durante e ultimo dianan cu guianan y operadornan di UTV/ATV, cu a expresa nan preocupacion tocante continuidad di nan actividad y trabou.

Segun Minister Herdé, Gobierno ta tuma e preocupacionnan aki seriamente. E meta no ta pa pone actividad economico y proteccion di naturalesa contra otro, sino busca un forma caminda ambos por existi dentro di un marco organisa y legal.

“Nos kier un solucion caminda e operadornan por sigui funciona di forma organisa y legal, pero cu e mesun responsabilidad pa cuida nos medio ambiente y naturalesa. Si nos coopera cu otro, nos por busca e balansa ey,” Herdé a indica.

Compromiso cu sector a wordo cumpli

Durante e dialogo cu sector, Prome Minister Mike Eman y Minister Herdé a indica cu Gobierno lo haci un esfuerso pa crea espacio adicional pa negociacion prome cu e caso sigui na Corte.

Segun Herdé, Gobierno awor a cumpli cu e palabra ey.

E informacion formal di abogado di Gobierno confirma cu a solicita Gerecht in Eerste Aanleg pa pospone e kort geding. E caso, inicia pa ABC contra Land Aruba y FPNA, ta actualmente agenda pa diahuebs 10 di september 2026 pa 10:00 AM.

Como parti di e procedimiento, Corte a pidi e otro partidonan pa duna nan posicion tocante e solicitud. Fundacion Parke Nacional Arikok (FPNA) a indica cu no tin obhecion contra postponemento, mientras ABC a indica cu tin obhecion. Na momento cu e carta di abogado a sali, e reaccionnan formal ainda no tabata presenta na Corte.

Preferencia ta acuerdo, no confrontacion

Minister Herdé a reitera cu preferencia di Gobierno ta pa e partidonan mes yega na un solucion, en bes di laga Corte determina e resultado.

P’esey invitacion na Aruba Birdlife Conservation pa sinta na mesa ta keda habri. Gobierno kier uza e espacio adicional pa continua dialogo y explora si por yega na un acuerdo cu ta atende tanto proteccion di naturalesa como continuidad di actividad di e sector.

Un desaroyo positivo, segun Minister, ta cu companianan di e sector a firma un carta di cooperacion, den cual nan ta expresa nan compromiso pa opera cu respet pa naturalesa.

Pa Herdé, esaki ta demonstra cu tin base pa sigui busca un solucion hunto.

Proteccion di naturalesa y trabou mester haya un balansa

Minister Herdé ta enfatisa cu Gobierno no ta cuestiona e responsabilidad pa proteha medio ambiente. Al contrario, esaki ta un responsabilidad cu Gobierno y sector mester carga hunto.

Na mes momento, Gobierno kier tene cuenta cu e grupo di hendenan cu nan entrada y trabou ta conecta directamente cu actividad di UTV/ATV.

“Nos mester por yega na un punto caminda nos por sigui cuida nos medio ambiente y, na mes momento, crea espacio pa e sector sigui haci su trabou conforme ley y cu respet pa naturalesa,” Herdé a expresa.

Gobierno ta awor pendiente di decision di Corte riba e peticion pa postponement. Mientras tanto, segun Minister Herdé, porta pa dialogo ta keda habri y esfuerso pa yega na un solucion ta continua.