Gobierno mester hiba control rigido riba companianan di construccion

Segun Diego de Cuba di Sindicato STA:

ORANJESTAD (AAN): Segun Diego de Cuba di Sindicato STA, hopi ciudadano no por bay banco cu nan salario pa pidi pa hipotheek pa construi cas. Awendia, pa yega na un prestamo pa yega na nan cas, parehanan, tur dos mester traha pa asina yega na nan vivienda. 

El a menciona cu tin un otro fenomeno na Aruba cu ta e situacion di Airbnb, cu manera el a expresa, lo ta un bon negoshi si esakinan tabata pertenece na nos hendenan local. Pero, esaki no ta e caso, hopi di nan ta di hende cu no ta di Aruba. 

De Cuba a expresa cu nos Arubianonan no ta hende rico dunando e expresion cu ta aki ta unda e rabo di porco ta krul. El a enfatisa cu si nos no tene cuenta cu esaki, aki porco dia nos ta worda saca for di nos pais door di stranheronan cu a bin inverti na Aruba. El a enfatisa cu Gobierno di Aruba mester ta hopi cauteloso.

E espacio pa construccion na Aruba actualmente ta hopi limita y a yega momento pa restructura. E ta conseha pa Gobierno sinta cu personanan cu tin experencia den construccion pa hunto realisa unda esaki a bay for di man. 

De Cuba a expresa cu loke cu Gobierno mester haci tambe ta pa inventerisa kico tin y kico por haci y tambe un inventarisacion riba tur compania di construcion, te hasta mester hacie ley pa tur compania di construccion registra, teniendo na cuenta cu tin hopi compania di construccion cu ta bin di afo y hopi ta entrega trabounan di construccion mal haci.

Señor de Cuba e termina bisando: “Mester di hende cualifica pa traha den construccion y mester traha segun regla y di loke e trabou di construccion ta exigi. Y no mester tuma hende den servicio pa dijes pusha e proyecto. Tur compania di construccion, mester emplea hende cu debidamente mester por eherce nan trabou”.

El a agrega cu tin hopi compania fantasma a lanta y traha construccion pa un of dos aña, hecha baina, y despues ta desaparece. Aki, segun de Cuba, ta unda cu Gobierno mester hiba control rigido.

Por conclui cu Gobierno no por sigui trata e escases di vivienda y e problemanan den sector di construccion como dos asunto separa. Ambos ta exigi un inventarisacion completo, ley y control rigido. Esaki mester inclui registro obligatorio di tur compania di construccion, supervision di calidad y e exigencia cu cada proyecto ta wordo ehecuta pa personal debidamente cualifica.