Lo tin consecuencianan pa propietarionan di Watersports cu no cumpli cu ley y regulacion

Minister Wendrick Cicilia:

ORANJESTAD (AAN): Minister di Turismo, Transporte y Labor, Wendrick Cicilia, recientemente a reuni cu e diferente instancianan cu ta envolvi den siguridad maritimo na Aruba, pa papia tocante e situacion actual riba nos lama, e retonan cu e instancianan ta confronta y loke mester wordo haci pa sigui fortalece siguridad.

   Durante e reunion un di e puntonan cu a bin dilanti ta e situacion di Maritieme Politie, cu actualmente ta confrontando reto pa loke ta trata material y ekipo cu nan mester pa por ehecuta nan trabao.

   Minister Cicilia a indica cu esaki ta un asunto cu ya tin su atencion y cu el a reuni cu Minister di Husticia, Arthur Dowers. Maritieme Politie ta cay bou di responsabilidad di Husticia, y p’esey ta importante cu tin coordinacion entre e ministerionan pa mira con por atende e necesidadnan cu a wordo identifica.

   “Nos a haya e noticia placentero cu lo bay duna atencion na Maritieme Politie den e presupuesto binidero. A aloca fondo pa reemplasa e boto, a aloca fondo pa sigui fortifica e ekiponan cu Maritieme Politie tin na su disposicion, pa nan por sigui efectua miho control tambe”, e minister a bisa.

   El a menciona cu ora ta trata di control riba lama, Maritieme Politie tin e regie den su man pa efectua e controlnan aki. Lo cual ta un responsabilidad comparti di diferente instancia, pero tambe cada un tin su tarea y mester cumpli cu e tarea aki debidamente.

   E minister a enfatisa cu mester traha pa mehora ta comunicacion y e compartimento di informacion entre e instancianan cu ta responsabel cu siguridad riba lama. Un meta di esaki ta pa evita incidentenan cu ta pone e sector turistico den luz negativo.

   Minister Cicilia ta menciona cu den nos ley y regulacion ta poni cu si un persona of compania di watersport tin un conducta cu ta contra ley, un vaargedrag iresponsabel, si esaki wordo identifica, por perde su permiso.

   Tambe, por ehempel, si no tin un spotter on board, si no tin propeller guard na ordo, si ta subi lama bou di un of otro tipo di influencia, por perde permiso pa opera. Riba e aspectonan tecnico, e minister a enfatisa cu cada seis luna e botonan ta wordo revisa pa Directie Scheepvaart.

   “Y esaki ta e mensahe cu nos kier comunica: cu e ta un responsabilidad colectivo, comparti di Gobierno, di Maritieme Politie, di Scheepvaart, pero tambe di e propio propietarionan di watersportvergunning, cu ta esnan cu tin e permiso, y ta esnan cu ta ultimamente responsabel. Y bo por perde bo permiso si acaso bo no ta cumpli cu e ley y regulacionnan cu tin riba papel e momento aki. Pasobra bo conducta iresponsabel riba lama ta trece bo propio bida na peliger, di esnan cu bo ta brindando e servicio, den e caso aki sea local of bishitante, pero tambe e usuarionan di nos awanan territorial”, Minister Cicilia a enfatisa.