Situacion financiero aworaki ta critico na Hospital

Parlamentario Dangui Oduber:

• Minister Wyatt Ras ta silencioso mientras cuido medico ta deteriora 

ORANJESTAD (AAN): Parlamentario Dangui Oduber di MEP a mustra cu informacion ta circulando cu e situacion financiero di Dr. Horacio E. Oduber Hospital (HOH) ta den un estado precario y delicado. Loke ta causa gran preocupacion ta e echo cu ta parce cu Aruba ta carece di un Minister di Salud Publico activo. Ningun hende ta scucha di dje, e no ta presenta vision ni maneho, y no tin ningun mehoracion den e calidad di cuido medico.

   Segun Oduber, al contrario, e situacion den e sector di salud a sigui deteriora: tin un escasez agudo di dokter di cas, e listanan di espera pa diferente specialismo a bira mas largo, e temponan di espera a aumenta y e cuido medico en general ta parce di ta navegando sin rumbo ni direccion concreto. Esaki ta e resultado directo di pone un persona cu no ta apto ni capacita pa lidera un cartera di e magnitud aki.

    Hospital sin medicamento:  No tin remedi, y e Minister cu no ta duna cara!  Segun Oduber, e panorama a bira mas alarmante awor cu e situacion financiero di hospital a alcansa un punto unda cierto proveedornan a cuminsa nenga di entrega medicamento na e institucion, sea pasobra nan NO ta ricibi pago of pasobra e pagonan ta tarda demasiado.

  Di con tin un silencio hermetico, mientrastanto e situacion ta empeora dia pa dia? Kico e Minister tin di sconde cu no ta bin Parlamento pa duna un splicacion detaya?

   Un Minister di Salud Publico tin e deber constitucional y e responsabilidad moral di informa pueblo y Parlamento riba situacionan cu ta afecta directamente e calidad di cuido y e servicionan di salud. No ta aceptabel pa un mandatario haci su mes invisible pa e pais y pretende di goberna den scuridad y silencio. Aruba nunca antes a presencia un abandono ministerial di e magnitud aki, caracterisa pa un falta total di vision, maneho y direccion. E salud y e bida di nos pueblo ta sagrado y no ta asuntonan pa hunga cune.

   Rendimento di cuenta y e proyecto di hospital: Nos ta expone e situacion aki pa exigi pa Minister Wyatt Ras asumi su responsabilidad y sali splica e situacion real di hospital. Ademas, ta keda e pregunta habri: di con te cu awor e proyecto di renobacion y construccion di hospital no a wordo entrega oficialmente, si desde September 2025 Parlamento a haya un invitacion pa e entrega di e proyecto aki?

   E pueblo aki merece transparencia, accion y un liderazgo cu ta duna cara, no un silencio cu ta pone bida di hende den peliger.