Awe ta e gran dia pa Torneo di Pesca na Hadicurari

Tur cos lo ta riba beach mes

ORANJESTAD (AAN): E dia a yega, y Arthur Giel, kende ta president di Fundacion Centro di Pesca Hadicurari, ta contento!  El a indica cu nan ta cla pa awe Diasabra nan tin nan famoso Torneo di Pesca.

   Manera DIARIO a anuncia varios ocasion caba, awe Diasabra 15 di Augustus, lo tin e Torneo di Pesca na Hadicurari.  E lo ta na beach pabao di Hadicurari, y lo ta un colaboracion cu Santa Rosa y tambe Aruba Wine & Dine.

   Esey nifica cu lo bay tin Fish Fry, y chefnan di Wine & Dine lo ta cla pa prepara platonan.  Publico lo por yega di 11:00 am te cu 6:00 pm.  Entrega di premio lo bay ta pa 5:00 pm.

   Debi cu e parkinglot y e caminda di Berea di Piscado ta yena demasiado cu auto, a prepara un plan pa stimula automobilistanan staciona den area di Sarah Quita Beach (banda di Fisherman’s Huts).  Aki lo bay tin e bus di Kuko Kunuku funcionando como shuttle, cu ta coriendo for di Sarah Quita Beach pa trece huespednan pa Hadicurari, y vice-versa.  E bus lo pasa cada 15 minuut.

   Segun Giel, e biaha aki lo bay tin banda musical, dak grandi pa hende sconde pa solo, animacion di DJ, cuminda, y tur hende lo goza di e torneo aki.