Colombia oficialmente a duna declaracion di desastre debi na temblor devastador di 7.4º

Cantidad di morto ta sigui pasando 150 morto...

• Hopi Arubiano a sinti e temblor y a evacua edificionan
• Destruccion na Cali, Manizales, y Pereira 

ORANJESTAD (AAN): Tin poco menos di 2 siman mas pa vakantie grandi finaliza y pesey tin hopi Arubiano bishitando ciudadnan di Colombia hunto cu nan famia pa asina disfruta di e dianan liber.

   Sinembargo esaki a bira diripiente den un momento di teror, ora cu pa exactamente 7:34 am (ora di Colombia), un temblor fuerte a cuminza sacudi varios ciudad.

   Dialuna 10 di Augustus 2026 lo ta un fecha cu Colombianonan lo no lubida, y tampoco decenas di Arubiano cu ta pasando dianan di vakantie na e.o. Bogota, Medellin, y Cali.

   Magnitud di 7.4: E temblor fuerte tabatin un magnitud (revisa) di 7.4º riba Scala di Richter, y segun Servicio Geologico Colombiano e epicentro a wordo localiza na 4.99º Nort y 76.29ºWest.  Esaki ta apenas 12 km leu di municipio San José del Palmar na Departamento Chocó.  E ta como 27 km leu di municipio El Cairo na departamento Valle del Cauca, y tambe 29 km leu di municipio El Aguila di departamento Valle del Cauca.

   E temblor sinembargo tabatin su epicentro hopi profundo mes, esta 103 km bao suelo.  Hopi biaha ora temblornan ta hopi hundo, e efecto na superficie ta menos.  Sinembargo e temblor aki a demostra cu no obstante e ta hundo, el a wordo sinti fuertemente na ciudad di Cali (cu ta 170 km mas zuid), tambe na Pereira (cu ta 60 km Oost-zuidoost), tambe na Manizales (cu ta 80 km Oost-Noordoost), tambe na Medellin (cu ta 147 km noord-noordoost), y a sacudi lugarnan na Bogota tambe (cu ta 230 km pariba).

   Arubianonan na careda: Ora cu e temblor a cuminza sacudi edificionan, principalmente Hotelnan unda Arubianonan tin costumber di keda, e forma violento di sacudimento a pone hopi di nan core baha trapi pa yega abao na suela y subi caya.

   Esaki a socede na e.o. Cali, na Medellin, y tambe tin Arubiano cu a core baha trapi di Hotelnan of nan Airbnb na Bogota.  Na Medellin a mira cu varios fachada di edificio a basha bin abao, pero e lugar mes a keda para.

   Na Cali sinembargo a mira hopi edificio basha den otro.  Oficialmente ta papia cu 20 edificio a basha bin abao.  Na Manizales y Pereira tambe a sinti sacudimento fuerte, y na e.o. Manizales mas di 10 edificio a bin abao.

   Medellin ta den departamento di Antioquia, y aki a registra 1 morto, y daño material na 29 misa, y na 352 cas.

   E temblor aki a wordo sinti te hasta na Panama, y tambe na Venezuela, unda apenas dia 24 di Juni cu a pasa a sufri di temblornan devastador di 7.1º y tambe 7.5º di magnitud.

   Declaracion di Desastre: President nobo di Colombia, Abelardo de la Espriella a tuma e decision despues di un reunion urgente cu Comision Nacional pa Maneho di Desastre, hunto cu gabinete di Ministronan, pa haci un declaracion di desastre di caracter nacional.

   E cifra di morto a cuminza draai e momento ey banda di 111 morto, y cu centenares di hende herida, y cifra creciente di hendenan perdi.

   Gobierno a bisa cu nan ta siguiendo e operacionnan di Search and Rescue den area di departamento Chocó, tambe e ‘Eje Cafetero’, y na Valle unda mayoria trabao ta andando, specialmente na Pereira, Manizales, Quibdo, Cali, y Armenia.