Atraco arma marduga riba habitante kende a caba di yega cas

Caso serio den Hubadastraat cerca di Companashi

ORANJESTAD (AAN): Tabata Diabierna poco despues di 1:00 am, cu Central di Polis a ricibi yamada urgente, pa indica cu un persona masculino a caba di wordo atraca den Hubadastraat.  Esaki ta e caya cu ta bay pariba, na altura di e rotonde di Ponton cu Santa Helenastraat y Caya Ernesto Petronia.

   Inmediatamente unidadnan di Polis di Playa a cuminza mobilisa pa e adres, y na mesun momento nan wowo ta extra hancho habri ta check demas comportacion di autonan den trafico.

   E prome unidad di Polis cu a yega na e adres den Hubadastraat, a wordo acerca pa un persona masculino.  El a splica na autoridad cu el a caba di bida victima di atraco arma.

   Segun su declaracion, el a caba di yega su cas, y diripiente tres homber bisti completamente na preto cu cara tapa, a bula riba dje y a saca un arma di candela su dilanti.  Nan a exigi pa e entrega su cartera.  El a hay’e obliga na haci esey, y apart di esey nan a bay cu su yabi di auto tambe.

   E tres personanan aki a comunica cu ne tanto den Papiamento y tambe na idioma Spaño.

   Despues di esey, nan a start e motor di su auto, y a bay cu ne di e lugar.  Asina e homber a core bati alarma.

   Cu e informacion aki, y di e marca y modelo di auto, a core notifica demas patruyanan riba caya pa tira bista riba esaki.  Polisnan mesora a pasa core den areanan unda hopi biaha atracadornan sa reuni despues di a dal ‘un hit’.

   Ademas di e unidadnan Policial coriendo rond buscando e sospechosonan, e Departamento di Atraco Team a presenta, hunto cu team forensico di BFTO pa haci nan investigacion.

   Un rato despues un unidad di Polis a bin topa cu e auto cu a wordo horta na altura di Bushiri. E auto a wordo confisca relaciona cu e investigacion andando.  Polis no a bisa cuanto placa tabatin den e cartera.  Pero lo investiga si acaso e victima kizas a wordo persigui poco-poco door di e atracadornan te ora cu nan a haya sa unda e ta biba.

   Cuerpo Policial Aruba ta haci un suplica na personanan cu por a mira algo of sa algo pa yama e Tiplime di Polis cu ta 111-41.  Nan ta garantiza cu bo ta keda anonimo no obstante cualkier informacion cu bo divulga.