Comunidad Peruano gradecido cu Premier su bishita na Peru

Directiva di Fundacion Fiestas Patrias Peruanos cerca Prome Ministro

ORANJESTAD (AAN): Prome Minister Mike Eman a ricibi Livany Lujan, vice-president, y Guillermo Salinas, president di Fundacion Fiestas Patrias Peruanos na Aruba. Durante e encuentro nan a dialoga tocante e celebracion di Dia di Independencia di Peru y e fuerte laso di amistad cu ta existi entre Aruba y Peru.

  E representantenan di e fundacion a expresa nan agradecimento pa e presencia di Prome Minister Mike Eman na Peru durante e ceremonia oficial di instalacion di presidente nobo, Keiko Fujimori. Segun nan, e participacion di e Prome Minister den un momento historico manera esey ta un muestra di e bon relacionnan diplomatico cu Aruba y Peru a construi a traves di e añanan.

   Prome Minister Mike Eman no por a tuma parti den e celebracion di Fiestas Patrias cu a tuma luga dia 28 di juli na Plaza Simon Bolivar na Aruba, precisamente pasobra e tabata representando Aruba na e ceremonia di instalacion di e presidente nobo di Peru. Pa motibo ey, e directiva di e fundacion a bishita e prome mandatario personalmente pa expresa nan agradecimento pa e representacion digno cu Aruba a tin na Peru.

   E encuentro a confirma e relacion estrecho  cu tin entre Aruba y Peru. Aruba ta cas pa un comunidad Peruano grandi y activo cu ta aporta na nos sociedad. Na mes tempo, e conexion entre ambos pais a wordo fortaleci den ultimo añanan danki na e vuelo directo di LATAM entre Lima y Aruba, cu a haci intercambio comercial, turismo y contacto entre e famianan y e comunidadnan hopi mas facil.

Durante e encuentro, e directiva di e fundacion a entrega varios regalo simbolico na Prome Minister Mike Eman, entre nan un tas tipico Peruano, un escarapela nacional, chuculati tipico di Peru y un Inca Kola, e refresco nacional di Peru.

   Nan a splica tambe e significado di e escarapela, cu den su centro e biaha aki nan a dicidi di pone e simbolo di e Sol Peruano, representando e moneda nacional y e fortaleza di economia Peruano den ultimo añanan. Guillermo Salinas a destaca cu e bishita di Prome Minister Mike Eman na Peru a fortalece e relacionnan diplomatico entre ambos paisnan. E fundacion a expresa tambe nan deseo pa sigui fortalece intercambio comercial y cultural entre Aruba y Peru, specialmente pa beneficio di hobennan.

   Durante e combersacion tambe a sali na cla e peticion pa hisa bandera di Peru na e rotonde cerca di Aeropuerto Internacional Reina Beatrix. Segun e representantenan, nan a presenta e peticion aki mas of menos dos aña pasa y durante e encuentro nan a pidi apoyo di Prome Minister Mike Eman pa sigui impulsan e proceso.

   Segun Livany Lujan, hisa bandera di Peru na Aruba lo ta un reconocimento importante pa comunidad Peruano y un manera di honra nan historia, tradicion y su costumbernan.

   Durante e encuentro, Fundacion Fiestas Patrias Peruanos na Aruba a entrega tambe un diploma di reconocimento na hefe di prensa di Gabinete AVP-Futuro, Marko Espinoza, pa su trayectoria profesional den periodismo y comunicacion  na Aruba. E fundacion a expresa su apreciacion pa e aporte cu el a a haci den prensa di Aruba y, actualmente, den comunicacion di Gobierno di Aruba, contribuyendo na fortalece e lasonan den nos comunidad.