Minister Wyatt-Ras a firma acuerdo cu Stichting Brasami

Pa fortalece acceso na tratamento residencial specialisa pa adiccion

ORANJESTAD (AAN): Minister di Salubridad, Asunto Social, Cuido di Adulto Mayor y Maneho di Adiccion, drs. Melvin G. Wyatt-Ras, a firma awe un acuerdo di cooperacion cu Stichting Brasami di Corsou.

   Cu e acuerdo aki, Gobierno di Aruba ta formalisa e colaboracion pa garantisa acceso continuo na tratamento residencial specialisa den e cuadro di cuido obligatorio pa personanan cu ta enfrenta problemanan serio di adiccion. E tipo di cuido aki actualmente no ta disponibel na Aruba.

   Tratamento residencial specialisa ta destina pa personanan cu ta enfrenta problemanan serio di adiccion y cu tin necesidad pa un ambiente terapeutico sigur y structura pa sostene nan proceso di recuperacion. Na Aruba tin diferente servicio y partnernan cu ta brinda cuido y apoyo na personanan cu ta enfrenta adiccion. E acuerdo cu Stichting Brasami ta complementa e cadena di cuido existente pa casonan cu ta rekeri un trayecto intensivo den e cuadro di cuido obligatorio.

   E acuerdo aki no ta destina pa cualkier persona cu tin problema di adiccion. E tratamento ta enfoca riba un grupo specifico di personanan cu por bin na remarke pa un trayecto specialisa y intensivo di tratamento den e cuadro di cuido obligatorio. Tin un comision di indicacion pa cuido largo den exterior cu ta evalua cada caso pa determina si e persona ta cumpli cu e criterianan pa cuido obligatorio den exterior. E decision final ta den man di hues.

   Minister Wyatt-Ras a indica cu e acuerdo ta forma parti di un vision mas amplio pa sigui fortalece un cadena di cuido mas structura y conecta pa maneho di adiccion na Aruba.
   “Cu e acuerdo aki, nos ta fortalece e cadena di cuido pa personanan cu ta enfrenta problemanan serio di adiccion. Nos kier brinda nan un oportunidad real pa recupera, rehabilita y biba un bida cu dignidad. Pasobra si bo yuda un persona cu adiccion, bo no ta yuda e persona so: bo ta yuda su famia y bo ta yuda henter comunidad.”

   Representante di Stichting Brasami a expresa su aprecio pa e cooperacion cu Gobierno di Aruba y a reafirma e compromiso comparti pa sigui brinda tratamento profesional y cuido di calidad na personanan cu tin necesidad pa e nivel di cuido aki.

   Cu e acuerdo aki, Gobierno di Aruba lo sigui traha hunto cu partnernan local y den region pa fortalece e cadena di cuido pa maneho di adiccion. Esaki ta contribui na un trayecto cu ta conecta tratamento specialisa cu cuido y sosten despues di e tratamento, cu enfoke riba recuperacion y reintegracion sostenibel den comunidad.