Castigo combina pa homber haya cu arma di candela y cantidad di bala na cas

Fiscal y Hues ta haya cu mester manda señal bon cla

ORANJESTAD (AAN): Diamars mainta e homber acusado J.V. di 51 aña a presenta dilanti Hues, como sospechoso di posesion di arma di candela y balanan. Fiscal ta acusa J.V. cu entre 1 Januari 2026 y 24 Juni 2026 e tabatin un pistol Glock y 48 bala. Fiscal a bisa Hues cu e problema di arma di candela na Aruba ta serio. E ta haya cu mester manda señal bon cla cu no ta tolera arma di candela. Hues den su sentencia ta comparti punto di bista di Fiscal y a condena J.V. na un castigo combina cu ta 1 luna menos cu e exigencia di Fiscal.

   Arma y 48 bala: Ta asina cu dia 24 Juni 2026, Polis a bay haci investigacion na e cas di J.V. na Dakota. Den su camber a haya un arma di candela Glock y 48 bala. E arma tabata carga cu 12 bala y e resto di balanan a haya den e camber.

   Homber a actua pa menaza contra yiu: Hues a puntra J.V. pakico e tabatin un arma di candela. J.V. a bisa cu tabatin problemanan pasando y el a bay den panico y a pensa cu busca un arma lo ta un solucion. El a bisa Hues cu e ta arepenti di a busca e arma.

   El a bisa cu nunca el a uza e arma y nunca a sali cu e arma. El a bisa cu su yiu homber a wordo menaza diferente biaha. A bay diferente biaha Recherche haci denuncia pero Recherche no a haci nada. J.V. a bisa Hues cu el a dicidi di manda e yiu Curacao. Despues cu e yiu a caba di studia, el a bolbe Aruba y atrobe menazanan a cuminsa. E ora ey el a dicidi di busca e arma.

   Hues a puntra con e menazanan tabata. Segun J.V. nan tabata manda mensahenan y tambe potret cu tin un prijs riba su yiu su cabez. Hues a puntr’e kico tabata e problema cu e yiu tabata haya menaza. J.V. a bisa cu door cu e ta traha, e no ta na cas tur ora pa sa kico tabata pasando. El a bisa cu na comienso di 2026 el a dicidi di busca e arma. El a bisa cu na dado momento el a dicidi di deshaci di e arma pero Polis ya a bay haci investigacion y a haya e arma.

  Arma ta hopi peligroso: Hues a remarca cu no ta por nada cu arma di candela ta prohibi. Hues a bisa cu arma ta sumamente peligroso. Hende ta uza arma pa mata otro. Hues a puntra J.V. si e lo bolbe usa arma. J.V. a bisa cu no y cu e kier haya ayudo di Reclassering pa dun’e guia.

    El a bisa cu nunca mas cu e lo busca arma. Hues a puntr’e con ta para cu e menazanan. J.V. a bisa cu e menazanan a baha. Ta asina cu na cas di J.V. ta biba su mayornan y J.V. ta esun cu ta mantene su famia.

   Fiscal a exigi castigo combina: Fiscal a bisa cu e ta haya legalmente proba cu J.V. tabatin un arma den su poder. El a bisa cu J.V. a admiti di tabatin un pistol y 48 bala. Fiscal a remarca cu posesion di arma ta un problema serio na Aruba. El a mustra cu recien un mucha homber di 16 aña a wordo tira mata. Fiscal a bisa Hues cu mester manda señal bon cla na comunidad cu no ta tolera arma di candela na Aruba. Fiscal a bisa Hues cu e ta puntra su mes si realmente J.V. lo a deshaci di e arma manera e ta bisa, si Polis no a haci investigacion. El a remarca cu e arma tabata carga cu 12 bala.

   Fiscal a bisa cu e ta sigui e maneho di Ministerio Publico y a exigi 9 luna di prizon di cual 3 luna ta condicional cu un tempo di prueba di 3 aña. Fiscal a bisa cu e no ta mira kico Reclassering lo por bay siña J.V. pa no tin arma di candela. E no ta haya guia di Reclassering necesario.

   Defensa Abogado: Abogado mr. Carlo a bisa Hues cu J.V. a admiti cu e tabatin arma. E abogado a pidi Hues pa tene cuenta cu e hecho cu 31 bala no ta Caliber di e arma cu J.V. tabatin. El a mustra Hues cu J.V. tabata miembro di un club di tiro y a keda cu algun bala. Abogado a mustra e carchi di miembro di club di tiro cu J.V. tabata te 201 y tambe documento di e balanan.

   E abogado a mustra cu e arma tabata warda den cas y no tabata riba caminda publico. Na opinion di mr. Carlo, segun e linea di maneho, esaki ta wordo considera un arma warda na cas. El a bisa cu ta promer biaha cu J.V. a cay den man di husticia. E abogado ta haya cu un castigo largo manera Fiscal a exigi, lo perhudica J.V. den keda cu su trabao y tambe cu J.V. lo no por paga hipoteca di e cas. E abogado a bisa cu J.V. a coopera completamente cu e investigacion di Polis.

   E abogado a pidi Hues pa castiga J.V. na castigo di prizon igual na loke e ta sera, cu un castigo condicional largo y un tempo di prueba largo.

   Sentencia: Hues a cera tratamento di e caso y a dicta sentencia di biaha. Hues a bisa cu ta un hecho cu J.V. tabatin un arma di candela carga cu balanan. Pa cu e castigo, Hues a bisa cu J.V. no tabatin intension criminal sino pa proteha su yiu. Hues a bisa cu J.V. pa proteha su yiu, a mand’e Corsou.

   Hues ta kere cu mester pone un castigo pisa. Hues a bisa cu e ta comparti punto di bista di Fiscal cu mester manda señal bon cla cu no ta tolera posesion di arma di candela. Hues no a sigui e peticion di abogado mr. Carlo. Hues a condena J.V. na 9 luna di prizon di cual 4 luna ta condicional cu 3 aña di prueba. Hues a bisa cu e no ta mira necesidad pa Reclassering guia J.V. El a ordena pa e arma y balanan wordo destrui.