SPA kier update riba mocion den Parlamento cu puntonan presenta door di e Sindicato

Lito Lacle, Presidente SPA:

ORANJESTAD (AAN) Presidente di Sindicato di Polis Arubiano (SPA), señor Lito Lacle, den entrevista cu DIARIO a splica cu 17 luna pasa 21 miembro di Parlamento a firma un mocion pa entrega na Parlamento, pa cu, entre otro “bodycam, dashcam” y ayudo psicologico pa agentenan di KPA  cu a pasa den cierto traumanan.

   “Mi a warda aworaki, practicamente 17 luna pa entrega y puntra pa un update riba esaki. Kico a wordo haci te aworaki pa e miembronan di Staten cu 21 a firma pa cu esaki, te aworaki?  Pues, nos kier un contesta riba esey. Corda cu e parti legislativo hopi biaha ta keda pa Staten. Dus, e trahamento di leynan. Anto, kico bo a haci te aworaki?”, Lito Lacle ta puntra.

   El a sigui bisa cu Mando Policial ta zorg pa KPA tin samenwerkings protocol cu Respaldo, pero e parti legislativo ta keda den man di Parlamento pa polis haye, pa por traha cu tur ley pero tambe pa transparencia di KPA pa cu pueblo y vice-versa.

   El a reitera cu p’esey e kier puntra tur 21 Parlamentario kico nan a haci te aworaki, y djey sigui cana.

   “E mas importante ta cu 17 luna pasa, 21 miembro di Parlamento a firma pa cu esaki y sostene e mocion aki unanimamente, y aworaki mi kier sa precies kico a pasa cu ne”, Lito Lacle, Presidente di SPA a reitera.

   SPA a entrega un carta dirigi na Presidente di Parlamento, na e Presidente di e Comision di Husticia, y awo nan kier wak kico ta e contesta riba esaki.