Contract entre Pais Aruba y SOGA practicamente a crea un monopolio

Jayburtt Dijkhoff, PhD como President Fundacion SIKI:

• Dijkhoff ta duda cu Parlamento ta na haltura di e contract aki di aña 2013 

ORANJESTAD (AAN)- Jayburtt Dijkhoff, PhD, kende ta President di Fundacion SIKI, den entrevista cu Matutino DIARIO, a enfoca riba e contract entre Land Aruba (Gobierno) y SOGA (Stichting Onroerend Goed Aruba.

   “Den e contract entre Pais Aruba y SOGA, ta bisa cu no por expande e Hospital, no por ofrece otro servicionan, no por lanta otro hospital na Aruba tampoco, sin tin e previo permiso di SOGA, a menos cu ta contratonan cu USA. Cu otro palabra, esaki ta un diseño ta haci, practicamente pa crea un monopolio, y e pregunta ta si Parlamento di Aruba mes ta na haltura di e acuerdo cu e diseño aki” Jayburtt Dijkhoff a expresa.

   El a agrega cu tin otro pregunta tambe, pero esun cu ta lanza ta si esaki ta e motibo pakico Hospital di Aruba ta keda insisti riba un fusion. “Si wak’e textual, na momento cu bin un fusion, basicamente no mester di cooperacion di ningun hende mas; nan por adkiri e propiedadnan, un mas aya na San Nicolas, y por sigui expande e servicionan di ImSan sin ningun tipo di problema. Legalmente, esaki kiermen cu practicamente, por ta Hospital ta buscando un manera su servicionan via e metodo aki. Pero e ta un ekivocacion grandi”, Jayburtt Dijkhoff a señala.

   El a sigui bisa cu esaki pasobra e contract ta bisa claramente cu, na momento cu un minister di salubridad, of mesun Pais Aruba, firma pa e suigeneris cu yama ImSan, bay den un tipo di reorganizacion hunto cu Hospital y bira un entidad,  na e momento ey tin kiebra di e contract aki y SOGA por tin un motibo pa bay Corte. “Of, enberdad no tin ningun sancion mara na esaki, pero e ta importante si, pa bisa cu full e diseño aki mi ta puntra mi mes, pa cual pashent a wordo acerca, scucha, pasobra na Aruba nos no tin mercado liber”, Jayburtt Dijkhoff a señala.

   Dijkhoff a subraya cu tur esaki ta basa cu ta bay hinca hopi placa, esta miyones den renovacion di HOH, nan ta bay elimina cualkier competencia, p’asina asegura SOGA su placa.

   “Soga ta haya tur luna casi 3 miyon Florin, mas cu 40 miyon pa aña, e ta sigura pa Landsbesluit, Hospital y ImSan ta haya lumpsum di AZV, e no ta mara na cuanto pashent nan ta atende of laga”, Jayburtt Dijkhoff, PhD a expresa, y a indica cu e ta duda cu Parlamento ta na haltura di e contract aki di 15 di Februari 2013.