Mester atende e problema di sushi rond di cas na su rais pa evita criaderonan di sangura

Segun Jurette Croes di DVG:

ORANJESTAD (AAN): Tur luga, obheto of artefacto unda awa por keda para, manera autonan bieu den cura, bleki, botter, y otro material cu por retene awa, ta forma un criadero potencial pa sanguranan broei. P'esey, ta di gran importancia cu ciudadanonan mantene nan cura y e areanan rond di cas limpi y liber di obhetonan cu por acumula awa.

   Segun señora Jurette Croes di Departamento di Salud Publico (DVG), e mensahe aki no ta solamente relevante durante e temporada di sangura, sino tambe pa mantene un ambiente saludabel y higienico. El a splica cu deshaci di sushi y material innecesario rond di cas ta yuda preveni criadero di sangura, pero tambe ta reduci otro riesgo pa salubridad y disfruta di un cura y area rond di cas limpi.

   Croes a agrega cu, apesar cu e posibilidad pa Aruba wordo impacta directamente pa un horcan ta relativamente chikito, casnan cu tin hopi artefacto, material of sushi acumula den cura ta core un riesgo mas halto di sufri daño den caso di un fenomeno natural di e tipo aki.

   Segun e, trabao di conscientisacion ta un proseso continuo. DVG ta sigui informa y conscientisa comunidad tocante e importancia di mantene nan entorno limpi, cu e meta di logra un cambio di comportacion y un mayor comprension di e riesgo cu acumulacion di awa y sushi ta representa.

   “Nos ta keda encurasha comunidad pa atende cu e problema na su rais den e areanan rond di nos mes. Esaki ta awanan acumula den artefactonan rond di cas unda sanguranan ta broei y multiplica hopi lihe”, señora Croes a enfatisa.

   Croes a indica tambe cu DVG ta traha den colaboracion cu City Inspector pa trata situacionnan extremo cu ta representa un riesgo pa salubridad publico. "Ta trata mas bien di casonan extremo na unda cu tin echt hopi sushedad rond di e cas”, señora Jurette Croes a duna di conoce.