APA ta enfoca pa haya ‘feedback’ di turistanan crusero pa hunto mantene e nivel di destinacion preferi pa nan

Segun Marc Figaroa di APA:

ORANJESTAD (AAN):  Marc Figaroa di Aruba Ports Authority (APA) den un entrevista recien cu DIARIO a duna di conoce cu pa APA ta importante pa haya e feedback di turistanan di crusero durante nan bishita na Aruba pa asina traha hunto pa mantene e nivel di destinacion preferi pa nan. 

El a remarca cu na november 2025 tawatin e prome edicion di Cruise Connect. E meta di esaki ta pa trece tur stakeholder hunto pa duna informacion y presenta y comparti e ‘feedback’ di linianan crusero. Tambe e encuentro ta duna APA oportunidad pa scucha di nan banda kico ta nan deseo of kehonan pa asina traha riba e mehoracion como producto Aruba. Ta e intencion pa haci Cruise Connect un evento anual. 

El a remarca cu APA ta percura pa e producto crusero pero e experiencia di e pasahero crusero ta encera su bishita completo na Aruba. Por lo tanto, e ta bisa cu mester sigui traha hunto pa mantene e nivel di e destinacion preferi di nan. 

Señor Figaroa a agrega cu desde aña 2024 cu e maneho di Welcome Plaza ta cay bou di APA, nan ta enfocando pa negoshinan mantene orarionan mas largo den dianan cu tin barco crusero. Pero tambe, durante dianan cu no tin barco crusero, APA ta motiva negoshinan pa igualmente keda habri mas laat pa bishitantenan cu no ta bin cu crusero. 

Tambe el a duna di conoce cu APA ta inverti pa mehora e calidad di Welcome Plaza. A verf edificionnan, pone bari di dushi y recien a pone banki nobo y e siguiente fase, ta pa pone un afdak e aña aki ainda. Segun e, e Welcome Plaza ta gusta pa e lineanan crusero y APA lo sigui mantene y mehora e producto aki, siendo e prome y ultimo imagen cu e pasaheronan crusero tin di nos pais. 

Tocante e tram, Figaroa a menciona cu e ta trece movecion den Playa ora tin barconan crusero y turistanan ta gusta e medio di transporte aki pa bay den centro di ciudad. El a agrega cu APA ta den proceso di discucion pa wak con pa traha hunto pa mehora e servicio di tram y hacie mas eficiente.